Президент Шавкат Мирзиёев Наманган вилоят фаоллари йиғилишида коронавирусга қарши эмлаш чора-тадбирлари ҳақида маълумот бериб ўтди. Бу ҳақда Xabar.uz мухбири хабар берди.

— Вакцина бўйича кўп ишлар амалга оширилмоқда. Хитой, Россия, Европа ва Ҳиндистон билан музокаралар олиб борилмоқда. Хусусан, «Спутник» вакцинасидан бир миллионта олиб келинади.

Биз халқимизни оммавий эмлаш чораларини кўрмоқдамиз. Аммо бу ишни шошилиб амалга ошириб бўлмайди. Ҳар бир инсоннинг танаси — индивидум. Ҳар куни икки-уч соат вақтимни вакцинация жараёнини ўрганишга бағишлайман. Европа билан мулоқотда бўляпмиз, Ангела Меркел билан алоқага чиқдик, Эрдоган билан музокара олиб бордик.

Бир нарсани тўғри тушунайлик — ҳар бир ҳудуднинг ва ҳар бир инсоннинг ўзига ҳос жиҳатлари бўлади. Шу сабабли ҳам эмлаш ишларини бафуржа амалга ошириш лозим. Сал вақт йўқотсак ҳам иқлимга ва халқимизга мос келадиган вакцинани топишимиз керак. Мингтадан битта тўғри йўл бўлса, ўшани қўллашимиз керак. Ота-бобомиз айтганидек етти марта ҳам эмас, 10 марта ўлчаб, бир марта кесишимиз шарт. Бу иш депутатлар муҳокамасига ҳам қўйилади. Ҳамма ўз фикрини билдирсин.

Мен учун халқимиз манфаати — энг асосий масала, чўққи. Вакциналар кўп, кимдир унисини мақтайди, бошқаси эса бунисини. Биз барчасини кўриб чиқяпмиз, яхшилаб синовдан ўтказиб, энг маъқулини танлаймиз. Пулидан қатъи назар, халқимиз учун керакли миқдорда сотиб олиб келамиз.

Худога шукр, коронавирус чекиняпти, кеча 11 киши касаллангани ҳақида маълумот берилди. Илоҳим касалликни жиловлаганимиз рост бўлсин. Аммо бир нарсани тўғри тушунайлик, хурсанд бўлишга ҳали эрта. Мен мана шу чиқишим давомида бутун халқимизга мурожаат қилмоқчиман — касаллик ҳамон ёнимизда юрибди, шунинг учун жиловни маҳкам ушлашимиз керак. Зийрак бўлишга мажбурмиз, — деди Президент.

Эслатиб ўтамиз, бироз вақт муқаддам Ўзбекистонга олиб келинаётган 1 миллионта «Спутник» вакцинасининг 500 мингтасини россиялик миллиардер Алишер Усмонов молиялаштириши хабар қилинган эди.

Xabar.uz ахборот таҳлилий портали давлат раҳбарининг ташрифини ёритишда давом этади.