Кристофер Ноланнинг «Одиссея» филми жаҳон прокатида 1,104 млрд доллар тўплаб, режиссёр фаолиятидаги энг кўп даромад келтирган киноасарга айланди. Бу ҳақда The Guardian Universal Pictures маълумотларига асосланиб хабар берди.

«Одиссея» Ноланнинг аввалги рекордчиси — 2012 йилда прокатдан 1,085 млрд доллар ишлаган «Қора рицар: Қайта туғилиш афсонаси» филмини ортда қолдирди. Режиссёрнинг энг кўп даромад келтирган филмлари рейтингида учинчи ўринни 2008 йилда экранларга чиққан «Қора рицар» эгаллаб турибди. Унинг жаҳон прокатидаги тушуми 1,005 млрд долларни ташкил этган.

«Одиссея» филмининг премераси 17 июл куни бўлиб ўтди. Филм Гомернинг машҳур достони асосида суратга олинган бўлиб, Троя уруши тугаганидан сўнг Одиссейнинг Итакага қайтишини ҳикоя қилади. Унинг уйига етиб бориши 10 йил давом этади.

Филмда бош ролни Мэтт Деймон ижро этган. Картинада, шунингдек, Энн Ҳэтэуэй, Роберт Паттинсон, Зендея, Том Ҳолланд, Шарлиз Терон ва Лупита Нионго суратга тушган.

«Одиссея» премерадан сўнг жаҳон прокатида биринчи ўринни эгаллади ва кетма-кет икки ҳафта охирида энг кўп томоша қилинган филм бўлиб қолди. Universal Pictures маълумотларига кўра, картина Деймон, Ҳэтэуэй ва Паттинсон фаолиятидаги энг даромадли филмга ҳам айланган.

Нолан филм режиссёри ва сценаристи бўлиш билан бирга, Эмма Томас билан биргаликда унинг продюсери ҳам бўлган. Филмнинг ишлаб чиқариш бюджети реклама ва тарғибот харажатларини ҳисобга олмаган ҳолда тахминан 250 млн долларга баҳоланган.

«Одиссея» 2026 йилда Universal Pictures киностудиясининг жаҳон прокатида 1 млрд долларлик чегарадан ошган учинчи филми бўлди. Бунга қадар «Супер Марио: Галактик кино» ва «Майкл» биографик филми ушбу натижани қайд этган.