Paramount кинокомпанияси дунёдаги энг йирик филмлар, телесериаллар ва анимациялар ишлаб чиқарувчи концернлардан бири — Warner Bros. компаниясини сотиб олиш бўйича келишувга эришди. Бу ҳақда Reuters хабар берди.

Шартнома қиймати — 110 миллиард доллар, бу Голливуд тарихидаги энг йирик битимлардан биридир.

Эслатиб ўтамиз, дунёдаги энг йирик стриминг сервиси — Netflix анчадан бери Warner Bros.ни сотиб олиш учун ҳаракат қилаётган эди, ушбу битим унинг бу курашдан чиққанини англатади.

«Netflix PSKY (Paramount) таклифига тенглашиш учун (яъни бу компания таклиф этган пулни тўлаш учун — таҳр.) қонуний ҳуқуққа эга эди. Барчангизга маълумки, улар якунда буни қилишмади. Бу эса бугун эрталаб PSKY билан келишув имзоланишига олиб келди. Вазият айнан шундай», — деди Warner Bros. компаниясининг даромадлар ва стратегия бўйича бош директори Брюс Кэмпбелл.

Ушбу келишув Paramount компаниясининг киносаноат бозоридаги мавқеини сезиларли даражада мустаҳкамлаши кутилмоқда. ОАВ хабарларига кўра, 110 миллиард долларлик шартнома Paramount компаниясига Warner Bros.нинг «Фантастик махлуқлар» ва «Матрица» каби машҳур франшизаларига эгалик қилиш имконини беради. Шунингдек, экспертларнинг фикрича, келишув доирасида HBO Max ва Paramount+ стриминг сервислари бирлаштирилиши мумкин. Бундай интеграция нафақат компаниянинг бозордаги ўрнини кучайтиради, балки Netflix учун жиддий рақобат муҳитини юзага келтиради.

Шу билан бирга, экспертлар Warner Bros.ни сотиб олиш бўйича ҳар қандай келишув истеъмолчилар учун танлов имкониятининг камайишига ва обуна нархларининг ошишига олиб келиши мумкинлигидан хавотир билдирмоқдалар. Қолаверса, соҳа мутахассислари мазкур бирлашув оқибатида иш ўринлари қисқариши ҳамда кинотеатрларда намойиш этиладиган филмлар сони камайиб кетишидан хавфсирашмоқда.