Андроид қурилмалар учун Xabar.uz мобил иловаси. Юклаб олиш ×

Бухорода эрини пичоқлаб қўйган аёлга суд ҳукми ўқилди

Бухорода эрини пичоқлаб қўйган аёлга суд ҳукми ўқилди

Бухоро вилояти Пешкў туманида яшовчи аёл турмуш ўртоғини пичоқлаб, унга тан жароҳати етказди. Жиноят ишлари бўйича Пешкў туман суди судьяси Фарруҳ Икромовнинг Xabar.uz’га билдиришича, унга нисбатан 5 йил муддатга озодликни чеклаш жазоси қўлланган.

Маълум бўлишича, Пешкў туманининг Қўрғонтепа қишлоғида туғилган Ф.З. 2018 йилда шу туманнинг Афшона қишлоғида яшовчи Н.Ж. билан турмуш қурган. Бир нафар фарзандлари дунёга келгач, улар ўртасида турли келишмовчилик пайдо бўла бошлаган. Н.Ж.нинг сурункали спиртли ичимликлар истеъмол қилиши аёлни ҳолдан тойдирган ва бу оилада тортишувларни авж олдирган. Турмуш ташвишларидан безган Ф.З. бир нафар вояга етмаган фарзандини олиб шу қишлоқдаги хонадонлардан бирида ижарада туриб яшай бошлаган.

Шундай кунларнинг бирида Фазилат турмуш ўртоғига қўнғироқ қилиб, фарзандини ёлғиз ўзи боқишда қийналаётганини айтиб, ундан овқат келтириб беришини сўраган. Бу пайтда тўйхонада маст ҳолда ўтирган эр хотини ва боласига тўйхонанинг овқатидан олиб борган.

Аёл бу гал ҳам эрини маст ҳолда кўриб, жаҳлланган ва уни ювинди овқат келтирганликда айблаган. Ўзаро тортишув бошланган. Маст эр хотинини уриб, сўккан. Шунда аёл боласини кўтариб, бу ижара уйдан ҳам чиқиб кетиши, нариги қишлоқда яшовчи опаси ва поччаси билан яшашини билдириб, қочиб чиқишга уринган. Бироқ, эр уни яна уриб, фоҳишаликда айблаган ва қўлидан тортиб ичкарига судраган.

Эрининг зулмидан қочиб улгурган Ф.З. эри Н.Ж.нинг ўзига қараб ташланиб келаётганида чаққонлик билан қўлига ошхона пичоғини олган ва  жонҳолатда пичоқни эрининг қорнига урган. Н.Ж. эса шундай ҳолатда ҳам бир қўли билан Фазилатнинг бўйнидан бўғган ва иккинчи қўли билан ўзининг қорнида санчилиб қолган пичоқни суғуриб олган.

«Ўшанда мен ўзимни ҳимоя қилмасам, эрим ўзимни пичоқлаб ташларди. Айни шу ҳолатда вояга етмаган фарзандимнинг чинқираб йиғлагани кўз олдимдан кетмайди», – дейди аёл судда.

Н.Ж. ўз қорнидан пичоқни чиқариб олган ва пичоқ ўрнидан қон кета бошлаган.

У ярим йўлда ҳушини йўқотган. Қишлоқдошлари уни Пешкў туман тез тиббий ёрдам бўлимига олиб боришган.

Аёлнинг хатти-ҳаракатлари учун унга нисбатан Жиноят кодексининг 104-моддаси 2-қисми «л» банди, яъни баданга қасддан оғир шикаст етказиш айблови қўлланилган.  

Суд ҳужжатларига кўра, аёлнинг оилавий шароити ва қарамоғида уч ёшли вояга етмаган фарзанди борлиги инобатга олиниб, унга нисбатан 5 йил муддатга озодликни чеклаш жазоси тайинлаган.

 

Изоҳлар

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг