Лондондаги «Уэмбли» стадионида Англия Лига Кубогининг финал учрашуви бўлиб ўтди. Бош соврин учун баҳсда «Манчестер Сити» ва «Арсенал» жамоалари ўзаро тўқнаш келишди.

Учрашув «Манчестер Сити» нинг 2:0 ҳисобидаги ғалабаси билан якунланди. Ўйин тақдирини иккинчи бўлимда Нико О’Райли томонидан киритилган иккита гол (60 ва 64-дақиқалар) ҳал қилди. Ушбу муваффақият эвазига «Манчестер Сити» ўз тарихида 9-марта Англия Лига Кубоги соҳибига айланди. Эндиликда  улар мазкур турнирда энг кўп зафар қучган «Ливерпуль» (10 та соврин) рекордига яқинлашиб олди — улар орасидаги фарқ атиги битта кубокни ташкил этмоқда.

Ўзбекистон миллий терма жамоаси ҳимоячиси Абдуқодир Ҳусанов «Манчестер Сити» таркибида майдонга тушиб, тўлиқ 90 дақиқа ҳаракат қилди. У учрашувнинг 32-дақиқасида Виктор Дёкерешга ишлатилган қўполлик учун сариқ карточка олди.

Ушбу ғалаба орқали Ҳусанов Англия Лига Кубогини қўлга киритган илк ўзбекистонлик футболчи сифатида тарихга кирди. Бу соврин ҳимоячи учун Англиядаги биринчи олтин медаль ҳисобланади.