Россия президенти Владимир Путин билан интервью 9 февраль куни эълон қилинади, дея маълум қилди америкалик телебошловчи Такер Карлсон.

Интервью унинг веб-сайтида эълон қилинади. Россия матбуоти бу суҳбат «АҚШни хавотирга солгани» ҳақида ёзди.

Қайд этилишича, Карлсон 1 февраль куни Москвага борган. Кейинроқ у Путиндан интервью олиш нияти борлигини маълум қилган. У бу қарорини америкаликлар Россия ва Украинада нималар бўлаётгани ҳақида «ҳеч қандай тасаввурга эга эмаслиги» билан изоҳлаган.

Телебошловчининг сўзларига кўра, Ғарб ОАВлари 2022 йил февралидан бери Россия президентидан интервью олишга «уринмаяпти».

MSNBC шарҳловчиси Френк Фиглюцци эса Россия раҳбари қарийб тўрт йил давомида «қонуний» Ғарб журналистларига интервью беришдан бош тортгани, аммо Карлсон билан гаплашишга рози бўлгани «шубҳали» эканини айтган.

Кремль Карлсон Путиндан интервью олганини тасдиқлади. «У тайёр бўлиши биланоқ эълон қилинади», деди Россия президенти матбуот котиби Дмитрий Песков.