Лондоннинг «Арсенал» клуби 2025/2026 йилги мавсумда Англия Премьер-лигаси чемпионига айланди.

Сешанба, 19 май куни энг яқин таъқибчи — «Манчестер Сити» «Борнмут» билан 1:1 ҳисобида дуранг ўйнади ва Микел Артета жамоаси мавсум тугашига бир тур қолганда узоқ кутилган чемпионликка эришди.

Микел Артета — Пеп Гваридиола («Манчестер Сити» бош мураббийси)нинг шогирди. Артета 2019 йилнинг декабрида, Унаи Эмеридан сўнг, «Арсенал»ни қабул қилиб олган. Унинг бошчилигида жамоа уч мавсумда кетма-кет иккинчи ўринни эгаллади ва жорий мавсумнинг катта қисмида пешқадамликни ўз қўлида ушлаб турди.

Бу зафар «Арсенал» тарихидаги 14-АПЛ чемпионлиги бўлди. «Арсенал»нинг бундан олдинги чемпионлиги 2003/2004 йилги мавсумда, яъни роппа-роса 22 йил аввал қўлга киритилган эди. Ўша мавсум футбол тарихига кирган, чунки Арсен Венгер бошчилигидаги ўша жамоа чемпионат давомида бирор марта ҳам мағлубиятга учрамай (26 ғалаба ва 12 дуранг билан) чемпион бўлган ва «Енгилмас жамоа» номини олган.