Бухоро вилоятининг Қоровулбозор туманида яшаб келаётган фуқаро Р.Ж. Инстаграм ижтимоий тармоғи орқали ўз тенгдоши бўлган 19 ёшли М.И. билан танишган.

М.И. ўзига тегишли бўлган «iPhone» русумли уяли телефон аппаратини арзон нархда сотаётганини айтган. Р.Ж. ўз тенгдоши таклиф этган «iPhone»нинг нархи 1 250 000 сўм миқдорида эканидан хурсанд бўлиб, уни сотиб олишини билдирган. М.И. эса Р.Ж.га ушбу пулларни ўзига тегишли бўлган пластик карта рақамига ўтказишини ва тўловни амалга оширгач, телефон аппаратини етказиб беришини айтган.

М.И. ўзи сўраган миқдордаги пулни ўз пластик картасига ташлаб олишга эришган. Орадан бир неча кун ўтишига қарамай, М.И. қоровулбозорлик тенгдошига «iPhone»ни етказиб бермаган. Ва Р.Ж.нинг саволларини ҳам жавобсиз қолдирган. Шундан сўнг Р.Ж. шубҳага туша бошлаган ва бу ҳақда ички ишлар органларига мурожаат қилишга мажбур бўлган.

Мазкур ҳолат юзасидан Ўзбекистон Республикаси Жиноят Кодексининг 168-моддаси (Фирибгарлик) билан иш қўзғатилган. Олиб борилган тезкор-техник суриштирув ҳамда тергов ҳаракатлари давомида ушбу жиноятни андижонлик шахс содир этгани аниқланган.

Айни пайтда ушбу шахснинг бошқа жиноятларга ҳам алоқадорлигини аниқлаш юзасидан тергов ҳаракатлари давом эттирилмоқда.