Бухоро вилояти, Қоракўл туманилик 21 ёшли У.Ш. тоғаси Х.А.нинг уйида ўғрилик жиноят содир этиб, ўғирланган пулларни ўзи яшаб келаётган ҳовлининг молхонасига кўмиб қўйган.

Жиноят ишлари бўйича Қоракўл тумани суди раиси Бобораҳим Очиловнинг «Xabar.uz»га билдиришича, ўғрилик кечки пайт содир этилган. Тоғасига тегишли бўлган пулларни унинг уйининг қаерида сақланишини билгани учун ҳам ўғрилигидан «из» қолдирмаган. Ва тоғасининг уйидан чиқибоқ, яширин равишда олган жами 6 800 000 сўм пулларининг маълум қисмини қарзларини «ёпиш»га сарфлаб юборган.

Бир неча соат вақт ўтгач, Х.А. хонадонига қайтган ва ўғрилик юзага келганини хаёлига ҳам келтирмаган. Орадан бир неча кундан кейин Х.А. онасидан Россия федерациясига ишга жўнаб кетиш учун 5 бош қўйларини сотиб, салкам 7 миллион сўмга яқин пулларни уйининг ички хонасидаги жавонга қўйганини, шу пулларни олиб чиқиб беришини сўраган. Х.А.нинг онаси эса бироздан сўнг ўғлига жавонда ҳеч қандай пул йўқлигини, жавон тартибсиз ётганини айтган. Она ва ўғил меҳнат қилиб топган барча пуллари ўмариб кетилганига гувоҳ бўлишган. Ўғрининг шахси ким эканини билишмаган ва бу ҳақда ички ишлар органларига мурожаат қилишган.

- Афсуски, уйимизни “урган” ўз жияним бўлиб чиқди,-деган Х.А.

Маълум бўлишича, У.Ш. тоғасининг уйидан ўғирлаб олган пулларини ўзи яшаб келаётган ҳовлининг молхонасига кўмиб қўйган. Бундан ота-онасининг хабари бўлмаган.

- У.Ш.га жиноят иши бўйича етказилган зарарларнинг тўлиқ қопланганлиги ҳамда жабрланувчининг судланувчига нисбатан даъвоси йўқлиги инобатга олиниб, унга Ўзбекистон Республикаси Жиноят кодексининг тегишли моддаси билан  2 йил муддатга ахлоқ тузатиш ишлари жазоси тайинланди,-дейди суд раиси.