Дания дунёдаги энг кучли квант компютерни яратиш режасини эълон қилди. QuNorth дея номланган ушбу ташаббус Microsoft ҳамда Atom Computing (Калифорния) компаниялари кўмагида амалга оширилади, деб хабар берди Bundle.

Лойиҳа учун Дания экспорт-инвестиция жамғармаси (EIFO) ҳамда Novo Nordisk жамғармаси 80 млн евро ажратди. QuNorth мақсади — Скандинавия минтақасида хатоларни тўғрилаш ўрнатилган «иккинчи даражали» (Level 2) квант тизимини биринчи бўлиб ишга тушириш.

Дастурий таъминотга Microsoft масъул — унинг Azure Quantum стекидан фойдаланилади. Аппарат қисмларини эса Atom Computing компанияси етказади, уларда «нейтрал атомлар» асосидаги илғор технология қўлланилган.

Яратиладиган «Магне» (афсонавий Торнинг ўғли номи берилган) тизими тахминан 50 та мантиқий ва 1200 дан зиёд физик кубит билан ишлай олиши кутилмоқда. Бу хусусиятлари билан у шу пайтгача яратилган квант компютерлар орасида «энг мукаммал» деган номга даъво қилиши мумкин.

Бугунги кунда бир тизимда физик кубитлар сони бўйича рекорд (1180) Atom Computing компаниясига тегишли, унинг рақобатчиси Quantinuum эса мантиқий кубитлар бўйича етакчи (50). Шу пайтгача бу икки жиҳатни бир тизимда ҳеч ким жамлай олмаган. «Магне» лойиҳаси бу борадаги дадил уриниш бўлади.

Квант технологиялари, таъбир жоиз бўлса, ҳали ривожланишнинг ибтидоий босқичида, уларнинг салоҳияти жуда улкан — янги дори-дармонлар яратишдан тортиб иқлимни моделлаштиришгача ўта мураккаб амалиётларни бажариш мумкин.

«Магне» компютерини қуриш 2025 йил кузида бошланиб, 2026-2027 йиллар чегарасида фойдаланишга топшириш режалаштирилган. Тизим пойтахт Копенгагенда ўрнатилади ва 100 фоиз Дания мулки ҳисобланади.