Бразилия собиқ президентида рак аниқланди.

12 сентябр куни давлат тўнтаришига уринишда айбланиб, 27 йиллик қамоқ жазосига ҳукм қилинган Бразилиянинг 70 ёшли собиқ президенти Жаир Болсонару тери саратонига чалинган. Бу ҳақда собиқ давлат раҳбари жарроҳига таяниб, CNN Brasil телеканали хабар берди. 

 14 сентябр куни Жаир Болсонару теридаги саккизта ўсимтани олиб ташлаш учун операция қилинди. Жарроҳлик гуруҳи раҳбари Клаудио Биролинининг телеканалга айтишича, жароҳатларнинг иккитасида собиқ президентнинг қўли ва кўкрагида жойлашган скуамоз ҳужайрали карсинома белгилари пайдо бўлган. “Бу энг зарарсиз ҳам, энг тажовузкор ҳам эмас, аммо бу  тери саратони”, деб тушунтирди жаноб Биролини. Унинг қўшимча қилишича, касаллик сабаб Жаир Болсонару мунтазам текширувдан ўтишини талаб қилади. 

Бир кун аввал жаноб Болсонару кўнгил айниши, бош айланиши ва қон босими пастлигидан шикоят қилиб, шифохонага ётқизилган эди. 

Жаир Болсонару 2023 йил январида Бразилиянинг амалдаги президенти Луис Инасиу Лула да Силванинг ҳокимият тепасига келишига тўсқинлик қилиш учун фитна уюштиргани учун 27 йилу 3 ойлик қамоқ жазосини олди. Жанубий Америка давлатининг кўплаб ҳарбий тўнтаришлар тарихига қарамай, Болсонару демократияга ҳужумда айбланган Бразилиянинг биринчи собиқ президенти бўлди.