Жаҳондаги энг йирик миллий фаровонлик фонди — Норвегия давлат пенсия жамғармаси Исроилнинг 11 компаниясига инвестиция киритишни рад этиб, ушбу мамлакатдаги ташқи бошқарувчилар билан барча шартномаларни бекор қилди. Фондни бошқарувчи Norges Bank Investment Management (NBIM) бу ҳақда баёнот берди.

2025 йил биринчи чораги якунида жамғарма активлари 1,7 трлн долларни ташкил этган.

Баёнотда айтилишича, Норвегия молия вазирлиги NBIMга мурожаат қилиб, Исроил компанияларига киритилаётган сармояларни қайта кўриб чиқишни сўраган. Маълум бўлишича, 2025 йил биринчи ярмида фонд инвестиция киритган Исроил компаниялари сони 61 тани ташкил этган. Улардан 11 таси Норвегия молия вазирлигининг акциялар индексига кирмаган.

Айни пайтга келиб Норвегия пенсия жамғармаси мамлакат молия вазирлигининг базавий индексига кирмайдиган Исроил компаниялари учун барча позицияларни тўлиқ ёпган. Фонд расмийлари таъкидлашича, эндиликда Исроилнинг индексга кирувчи компаниялари учун ҳам сармоя киритилмайди.

Бундан ташқари, Норвегия пенсия жамғармаси Исроилдаги ташқи бошқарувчилар билан барча шартномаларни бекор қилиб, барча сармояларни фонднинг ўз компанияларига ўтказди.

«Бу чоралар фавқулодда вазиятларга жавобан қабул қилинди. Ғазо секторидаги вазият жиддий гуманитар инқирозга олиб келди. Биз уруш ҳолатида бўлган мамлакатда ишлаётган компанияларга сармоя киритяпмиз, Иордан дарёсининг ғарбий қирғоғи ва Ғазо секторидаги вазият эса янада ёмонлашмоқда», — деди Norges Bank Investment Management бош директори Николай Танген.

Маълумот учун: Норвегия молия вазири Йенс Столтенберг — катта сиёсатчи, НАТОнинг собиқ бош котиби. Ўтган ҳафта унинг топшириғи билан Исроилга киритилаётган инвестицияларни тафтиш қилиш бошланди. Бунга эса Aftenposten газетасида чиққан мақола сабаб бўлди, унда ёзилишича, норвег пулларини олаётган Bet Shemesh Engines (Исроил) компанияси Ғазога ҳужум қилаётган қирувчи самолётларга хизмат кўрсатмоқда.