Финляндия пиёдаларга қарши миналарни тақиқлаш тўғрисидаги Оттава конвенциясидан чиққани ҳақида БМТга расмий хабар йўллади.

«Финляндия пиёдаларга қарши миналар тўғрисидаги Оттава конвенциясидан чиқиши ҳақидаги ҳужжатни 2025 йил 10 июлида тақдим этди. Чиқиш расман 2026 йил январидан кучга киради. Финляндия Конвенциянинг инсонпарварлик мақсадларини қўллаб-қувватлашда давом этади», — дейилади мамлакат ТИВ баёнотида.

Қўшимча қилинишича, мамлакатнинг конвенциядан чиқиши унинг халқаро ҳуқуқ доирасидаги бошқа мажбуриятларига таъсир қилмайди.

Аввалроқ Полша ҳамда Болтиқбўйи мамлакатлари ҳам Оттава конвенциясидан чиққан эди. Сабаб — Россия ҳудудидан кутилаётган хавф.

Маълумот учун: Оттава конвенцияси 1999 йилда кучга кирган, пиёдаларга қарши миналардан фойдаланишни ман этади, Халқаро қизил хоч қўмитаси пиёдаларга қарши миналар тинч аҳолига катта зиён етказишини ҳисоблаб чиққан. Пиёдаларга қарши миналарнинг улкан захирасига эга Россия ушбу конвенция иштирокчиси эмас. Шунингдек, Саудия Арабистони ва Исроил ҳам конвенцияга қўшилмаган.