Камчаткада Евроосиёнинг энг баланд ва фаол вулқонларидан бири — Ключи сопкаси фаоллашди. Яриморолда минтақада 1952 йилдан буён юз берган энг кучли зилзиладан сўнг вулқон уйғонган.

Россия ФА Ягона геофизика хизмати хабар беришича, Ключи сопкасининг ғарбий қиялиги томонидан лава оқишни бошлаган. Кратер тепасида ёрқин нурланиш ва портлашлар кузатилмоқда. Кратерда лава тўпланиши давом этмоқда, 10 км баландликкача кул сочилиши кутилмоқда, деб огоҳлантиришди сейсмологлар.

Ключи сопкасининг баландлиги 4 850 метр. Петропавловск-Камчатскийдан 360 км олисда жойлашган вулқон сайёрамиздаги энг фаолларидан саналади.

Эслатиб ўтамиз, 30 июлга ўтар кечаси Камчаткада 8,7 магнитудали кучли зилзила юз берди. Эпицентри Тинч океанида, Петропавловск-Камчатскийдан 198 км олисда жойлашган.

Табиий офат қурбонлари йўқ. Бироқ Курил оролларига цунамининг тўртта тўлқини келиб урилди. Шунингдек, Япония, Хитой, Гавайи ороллари, Чили, Эквадор, Перу ва Мексикада цунами хавфи эълон қилинди. Кун давомида минтақада афтершоклар (такрорий зилзилалар) кузатилган, улардан бирининг магнитудаси 6,2 балл дея баҳоланган.