Халқаро олимлар жамоаси хулосасига кўра, кам таъминланган оилалардан чиққан одамлар нисбатан тез қарийди. Тадқиқот натижалари Aging журналида эълон қилинди.

Тадқиқотчилар ДНКнинг характерли кимёвий белгилари бўйича инсоннинг биологик ёшини баҳолаш имконини берувчи «эпигенетик соатлар»дан фойдаланишди. Агар у паспортда кўрсатилгандан юқори бўлса, инсон биологик жиҳатдан тез қариётганини англатади.

Буни аниқлаш учун болалигида IQ даражаси ўлчанган, ўрта ёшда худди шу тестдан яна ўтган ва қон намуналари олинган 300 га яқин иштирокчи маълумотлари таҳлил қилинди.

Маълум бўлишича, касаллик ва ўлим хавфини ҳисобга олган ҳолда ишлаб чиқилган янги «иккинчи авлод» эпигенетик соатлари (PhenoAge ва GrimAge) 50 ёшга борганда IQ пасайишини яхшироқ башорат қилади. Қолаверса, бу таъсир ҳатто бир оилада тарбияланган эгизакларда ҳам сақланиб қолиши ойдинлашди: биологик ёши каттароқ бўлганларнинг когнитив функциялари кучлироқ пасайган.

Тадқиқотнинг диққатга сазовор томони — энг сезиларли заифлик кам таъминланган оилалардан чиққан одамларда аниқланганидир: эрта ижтимоий стресс алалоқибат инсоннинг қаришини ҳам тезлатиб юборади, дейишмоқда муаллифлар.

Олимларнинг таъкидлашича, деменция ва бошқа ёшга боғлиқ бузилишлар хавфини аниқроқ баҳолашда биологик ёшни ДНК бўйича кузатиш билан бир қаторда, инсоннинг ижтимоий келиб чиқишига ҳам эътибор қаратиш муҳимдир.