17 маротаба қотилликка қўл ургани учун 13 та умрбод қамоқ жазосини ўтаётган Италия тарихидаги энг шафқатсиз жиноятчилардан бири Падуя қамоқхонаси шифохонасида коронавирусдан вафот этди. Бу ҳақда «Corriere della Sera» ёзмоқда.

Донато Биланчи 69 ёшда эди, умрининг сўнгги 22 йили панжара ортида ўтди, шунга қарамай, бухгалтерлик ишини ўрганди, ҳатто маданий туризмни режалаштириш ва бошқариш соҳасида илмий даражали ҳам бўлди.

Аммо журналистлар «Лигурия махлуқи»ни асло кўздан қочиришмаганди: 15 та қотилликда терговчилар бирон-бир мантиқни топиша олмаган.

Қотилнинг ўзи иқрор бўлишича, илк қурбони — энг яқин дўсти эди. Айтишича, дўст бўла туриб унга хиёнат қилган. Биланчининг қимор ўйинларига суяги йўқлигини била туриб, 1997 йилнинг ёзида махфий казинога олиб борган. Бошланишига омади чопганидан сармаст Донато охирида бор пулини қиморхонада «ташлаб чиқишга» мажбур бўлган. Ва бу ерга келишни канда қилмай қўйган... Кунларнинг бирида дўстининг казино одамларидан бири билан суҳбати қулоғига чалиниб қолади — билсаки, у қиморхонага янги мижозларни жалб этиш эвазига ҳақини олиб юраркан...

14 октябрь кечаси Биланчи ўша танишини бўғиб ўлдиради, орадан 10 кун ўтиб эса казино менежери ва унинг хотинини тўппончада отиб ташлайди (кейинги қотилликларида ҳам шу қуролини ишлатган).

Кейинчалик, тергов давомида, иқрор бўлишича, нима учун одамларни ўлдираётганини ўзи ҳам яхши англаб етмаган. Буни кейинги қотилликлар «сценарийси»дан ҳам илғаш қийинмас: қўшқотилликдан сўнг уч кун ўтиб, ўзи танимайдиган эр-хотинга қўл кўтаради, шу тариқа етти ой давомида тасодифан дуч келган одамлар унинг қурбонларига айланаверади. Айрим аёлларни поездларнинг ҳожатхоналарида отиб ташлаган...

Савдойи қотил Лигуриядан ташқари Пьемонтни ҳам даҳшатга солиб келган. Жиноятчининг изига тушишда у машинасини нотўғри тўхтатгани учун ёзилган жарималар иш берган — қотил навбатдаги «ишини» амалга оширган жойи яқинида машинасини қолдириб кетаверган. Биланчи бир уйнинг кираверишида ташлаб кетган сигарет қолдиғидан олинган ДНК таҳлили унинг қўлга олинишида ашёвий далил бўлганди.

1998 йилнинг 6 май куни газеталар Биланчи 17 та қотилликни бўйнига олгани ҳақида ёзганида бутун Италия қалқиб тушганди.

2000 йилнинг апрелида Донато Биланчига суд ҳукм ўқиди: 13 та умрбод қамоқ жазоси. Афтидан, шунча қилмишига қарамай, Биланчи «тузалиши»га қаттиқ ишонган. Бухгалтерликни ўрганиб, маданий туризм соҳасида илмий даражали ҳам бўлган. Унинг режаларига коронавирус сўнгги нуқтани қўйди.