Дунёнинг тўртта мамлакатида 1,1 миллиондан ортиқ одам биринчилардан бўлиб коронавирус инфекциясига қарши эмланди, дея маълум қилди «Bloomberg».

«Бу тарихдаги энг кенг қамровли эмлаш кампаниясининг бошланиши ва шу пайтгача амалга оширилган энг катта логистика муаммоларидан бири», — дея таъкидлади агентлик.

Шундай қилиб, 14 декабрда COVID-19га қарши кенг миқёсда вакцинация бошланган АҚШнинг 24 та штатида, жумладан, Нью-Йорк, Техас ва Колорадода 49,5 минг киши вакцинанинг биринчи дозаларини қабул қилишди.

Таъкидланишича, 15 декабрь ҳолатига кўра Россияда 320 минг киши, Буюк Британияда эса 137,8 минг киши инфекцияга қарши эмланиб бўлди. Шу билан бирга, Хитойда 28 ноябрь ҳолатига кўра 650 минг киши вакцинация қилинган.

Агентликнинг аниқлик киритишича, бугунги кунда дунёнинг олтита мамлакатида COVID-19га қарши атиги бешта вакцина фойдаланиш учун чекланган миқдорда мавжуд.

Россияда коронавирусга қарши кенг кўламли эмлаш ишлари 5 декабрь куни Москвада бошланди. Бунинг учун шаҳардаги катта-катта поликлиникаларда 70 та эмлаш пунктлари очилди. Барча хоҳловчилар «Спутник V» вакцинаси билан эмланмоқда. 15 декабрда мамлакатнинг барча ҳудудларида инфекцияга қарши эмлаш ишлари бошланди.

8 декабрь куни Буюк Британия коронавирусга қарши вакцинацияни бошлади. Мамлакат ўз фуқароларини эмлашни бошлаган биринчи Ғарб давлатига айланди. Вакциналар биринчи бўлиб ҳукумат томонидан аниқланган хавф гуруҳига кирувчи кишиларга берилади. Бунинг учун «Pfizer» ва «BioNTech» препаратлари қўлланилмоқда. Эмлаш ихтиёрий, бепул ва таклиф асосида амалга оширилади.

SARS-CoV-2 вируси қўзғатган COVID-19 касаллиги декабрь ойининг охирида Хитойнинг Ухань шаҳрида пайдо бўлди. Кейин вирус бошқа мамлакатларда тарқала бошлади. 11 март куни Жаҳон соғлиқни сақлаш ташкилоти (ЖССТ) дунёда коронавирус тарқалишини пандемия дея эълон қилди.

«Worldometer» халқаро статистика бюроси маълумотларига кўра, бугунги кунда дунёда 75,5 миллиондан ортиқ кишида коронавирус қайд этилган. 1,6 миллиондан ортиқ бемор вафот этди, деярли 53 миллион одам тузалди.