Японияда эскалаторда туриб, ёнидан бошқа йўловчиларни ўтказмаган одамларга пул тўлаш бошланди, деб хабар берди Sora News.

Йўловчиларни эскалаторларда юрмасликка ва унинг ҳар икки томонини банд қилишга чорлаётган илк шаҳарлардан бири Нагоя бўлди. Мақсад — жароҳатланишлар сонини камайтириш, айниқса, кексалар ва болаларни авайлашдир, дейилади хабарда.

Янги қоидани амалга киритиш учун одамлардан гуруҳлар тузилмоқда: улар эскалаторнинг бир томонини эгаллаб, ҳаракатланиш пайтида тинч туришга чақирилган ёзувларни кўтариб олишади. Битта гуруҳ бир сменада 19 та темирйўл станциясида олти соат ишлайди. Гуруҳ раҳбарига кунига тахминан 110 доллар, қолган аъзоларга 45 доллардан тўланади. Ташкилотчиларнинг айтишича, бу айниқса, талабалар ва пенсионерлар учун пул топишнинг яхши йўли.

Ҳокимият вакиллари эскалаторнинг икки томонини банд қилиш хавфсизликни таъминлаб, йўловчилар оқимини тартибга солишини таъкидлашмоқда. Аммо танқидчилар ҳам етарли, чеклов эскалаторларда шошиб юрувчиларнинг кутиш ва ҳаракатланиш вақтини янада узайтиради, дейишмоқда улар.

Бундан ташқари, тадқиқотлар кўрсатишича, йўловчилар оқимини самарали бошқариш кўпроқ станциянинг юкламасига боғлиқ: тиғиз паллаларда эскалаторларнинг икки томонини банд қилишдан ютиш ютиш мумкин, аммо йўловчилар кам пайтда деярли фарқ йўқ.