Непалда Ҳукуматнинг Instagram, Facebook, Youtube, Х ва бошқалар каби машҳур платформаларни блоклаши ортидан мамлакат бўйлаб ёшлар (Z авлоди вакиллари)нинг норозилик намойишлари авж олиб кетгани ва куч ишлатар тизим билан тўқнашувларда 14 кишининг ҳалок бўлгани хабар қилинган эди.

Намойишчилар мамлакат парламенти биносини ёқиб юборди. Шунингдек, собиқ бош вазирнинг уйи ва Hilton меҳмонхонасида ҳам ёнғинлар кузатилмоқда.

Непал Конгресси раиси ва собиқ бош вазир Шер Баҳадур Деуба ҳамда унинг рафиқаси Аржу Рана Деуба Катмандудаги норозилик намойишчилари томонидан ҳужумга учради, дея ёзмоқда The Insider нашри.

Бундан ташқари, India Today'нинг маълум қилишича, намойишчилар молия вазири Прасад Пауделга ҳам ҳужум қилган.

India Today куннинг иккинчи ярмига келиб, намойишлар вақтида ҳалок бўлганлар сони 22 киши га етганини ёзди. Яраланганлар сони эса бир неча юз нафар деб баҳоланмоқда.

Намойишчилар Шарма Олининг истеъфосидан сўнг Катманду мэри Балендра Шаҳни вақтинча бош вазир этиб тайинлашга чақирмоқда.

Ўз навбатида, Непал ҳукумати оммавий норозилик намойишларидан сўнг ижтимоий тармоқларга қўйилган тақиқни бекор қилган.

«Бу қарор душанба куни бўлиб ўтган норозилик намойишларида 19 киши ҳалок бўлиб, юзлаб одамлар жароҳатлангач қабул қилинди. Намойишчилар парламент биносига бостириб киришга уринган, полиция эса бунга жавобан кўздан ёш оқизувчи газ, сув пуркагичлар ва таёқлардан фойдаланган», – дея ёзмоқда Reuters.