Финляндиянинг Nokia компанияси бу сафар янги ҳамкор билан биргаликда мобил қурилмалар бозорига қайтадан кириш ниятида эканлигини маълум қилди.

Компаниянинг Reddit платформасидаги расмий саҳифасида маълум қилинишича, Nokia ўз бренди остида мобил қурилмаларни биргаликда ишлаб чиқиш ва чиқаришга тайёр йирик ишлаб чиқарувчи – ҳамкорни фаол изламоқда.

Сўнгги йилларда Nokia бренди бозорда фақат смартфонлар ва тугмачали телефонлар ишлаб чиқарадиган HMD Global билан лицензия шартномаси орқали тақдим этилди. Бироқ, бу келишув муддати 2026 йилда тугайди ва Android Authority маълумотларига кўра, унинг узайтирилиши даргумон. HMD аллақачон ўз бренди остидаги қурилмаларни тарғиб қилмоқда, бу эса Nokia билан ҳамкорликни босқичма-босқич қисқартиришдан далолат беради.

Таҳлилчиларнинг таъкидлашича, Nokia бренди ёш фойдаланувчилар орасида ўтган ўн йилликларга қараганда анча суст танилган. Финляндия компанияси смартфонлар бозорида ўз ўрнини тиклаш учун жиддий ҳаракат қилиши керак бўлади. Кучли шерик ва замонавий смартфонлар бўлмаса, бозорга қайтиш рамзийлигича қолиши мумкин.