«Ушбу мавсумдан бошлаб, Суперлига ҳамда Про-Лига клубларига нисбатан кўриладиган интизомий ҳамда жарима санкциялари ўзгартирилди. Эндиликда, клуб, клуб расмийлари ва бошқаларга қўлланиладиган интизомий ва жарима чоралари бироз ўзгарди», — дея хабар бермоқда ЎФФ расмий сайти.

Санкциялар характери ҳамда суммаси ЎФФ Тарти-интизом Қўмитаси томонидан унинг жиддийлик ҳамда юмшатувчи омиллари ҳисобга олинган ҳолда белгиланади. Жарима санкциялари қўшилиб, умумий ҳисобланиши мумкин.

Клуб ва стадионларга нисбатан қўлланиладиган санкциялар қуйидагича:

а) огоҳлантириш;

б) учрашувни мухлисларсиз ўтказиш;

в) стадионни дисквалификация қилиш;

г) учрашувни нейтрал стадионда ўтказиш (бошқа шаҳарда);

д) учрашувни қайта ўтказиш;

е) учрашув ҳисобини бекор қилиш;

ж) техник мағлубият;

з) моддий жарима 500 000 000 сўмгача;

и) янги футболчиларни рўйхатдан ўтказишга рухсат бермаслик;

к) очколар олиб ташланиши;

л) мусобақа иштирокчилари сафидан чиқарилиши. Ушбу майдондан берухсат чиқиб кетиш, учрашув ўтказишдан бош тортиш, учрашувга ташриф буюрмаслик каби ҳолатларда қўлланилади.

Шунингдек, клуб раҳбарлари, расмийлар ва футболчиларнинг учрашувдан олдин, учрашув давомида ҳамда учрашувдан кейинги ноэтик, спортчиларга хос бўлмаган ҳатти-ҳаракатларни амалга оширса, ҳакамлар, назоратчи, ПФЛ комисссари, меҳмон жамоа ҳамда учрашувнинг бошқа расмийларини кутиб олиш ҳамда кузатишда Регламент талабларини ҳамда мусобақалар регламенти асосида клублар ҳамда стадионларга қўйилган ҳар қандай талаблар бажарилмаса, уларга нисбатан шунингдек, 500 миллион сўмгача жарима қўлланилиши мумкин.

Расмий шахслар, клуб (жамоа) раҳбарлари ҳамда клубнинг бошқа ходимларига нисбатан қўлланиладиган интизом ва жарима санциялари эса қуйидагича:

а) огоҳлантириш;

б) Ўзбекистон Чемпионати, Ўзбекистон Биринчилиги ҳамда Ўзбекистон Кубоги учрашувларини ўтказиш билан боғлиқ расмий мажбуриятларидан дисквалификация қилиш ёки маълум муддатга четлатиш;

в) 500 000 000 сўмгача моддий жарима;

г) мураббийдан лицензиясини олиб қўйиш;

д) ҳар қандай турдаги футбол фаолиятидан маълум муддатга четлатиш.

Ушбу санкциялар учрашувдан олдин, учрашув вақтида ёки учрашувдан кейинги ҳар қандай ноэтик ва спортчиларга хос бўлмаган хатти-ҳаракатлар, мусобақа ўтказиш ҳамда лицензия бўйича талаблар қўпол равишда бузилса ва шу каби бошқа ҳолатларда қўлланилади.