Олов ёқиш 400 минг йил аввал пайдо бўлган — тадқиқот
2017 йилда топилган пирит парчаси.
Британияда 400 минг йил аввал неандерталлар ёққан олов излари топилди. Nature журналида чоп этилган тадқиқот-мақолада маълум қилинишича, Барнҳам яқинидаги манзилгоҳда куйдирилган лой бўлаги, юқори ҳароратдан ёрилиб кетган кремний (чақмоқтош) болталар ва иккита пирит парчаси топилган.
Куйдирилган лой ўрмон ёнғинининг оқибати эмаслигини тушуниш учун олимларга тўрт йил керак бўлди, дейилади хабарда. Геокимёвий таҳлил у 700°C дан юқори ҳароратда бир неча бор қиздирилганини кўрсатди. Бу неандерталлар чақмоқтошга пирит бўлагини уриб, олов ҳосил қилишни билганликларини кўрсатади.
Пирит бу манзилда учрамайди, унинг олов ҳосил қилувчи хусусиятини тушунган неандерталлар олис манзиллардан келтиришгани тахмин қилинмоқда.
Шу пайтгача Францияда топилган 50 минг йиллик топилмалар оловни сунъий ҳосил қилишнинг энг қадимги далиллари ҳисобланган.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter