Кеча 29 сентябрь куни Россия эстрадасининг примадоннаси Алла Пугачёва эгизак фарзандлари билан Россияни тарк этди. Бу ҳақда Экспресс газетаси хабар берди.

Дастлабки маълумотларга кўра, хонанда фарзандлари Лиза ва Гаррини мактабдан олиб, пойтахтнинг Внуково аэропортидан Исроилга учиб кетган. Унинг қайтиши ҳақида ҳозирча хабар йўқ.

Жорий йилнинг февраль ойида Россиянинг Украинага бостириб кириши ортидан Алла Пугачёва оиласи билан аввал Исроилга, кейин Латвияга кўчиб ўтган эди. Сентябрь ойида бошланган янги ўқув йили муносабати билан фарзандлари ҳамроҳлигида Москвага қайтган примадоннанинг қадами оғир келди. Аввалига унинг эри «Махфий агент» деб топилди, кейин эса Пугачёва эри билан ҳамфикрлигини билдириб уни ҳам «махфий агентлар» қаторига қўшишларини сўради ва Путин режимини қоралади. Аксига олиб бу вақтда Максим Галкин Россияда эмас эди.

Маълумот ўрнида, Максим Галкин ва Алла Пугачёва 2005 йилда турмуш қуришган. Галкин ўз рафиқасидан 27 ёшга кичик бўлиб, жуфтликнинг Лиза ва Гарри исмли эгизак фарзандлари бор.