Бокс бўйича Ўзбекистон терма жамоасида жаҳон чемпионатидаги иккинчи йўқотиш юз берди. -48 кг вазн тоифасида юртимиз шарафини ҳимоя қилган Шодиёржон Мелиқўзиев қозоғистонлик Санжар Ташкенбайга имкониятни бой бериб, мусобақа билан хайрлашди.

Ўзининг биринчи жангида барчада ёрқин таассурот қолдирган ҳамюртимиз Лазизбек Мулложонов эса навбатдаги рақибидан устун келди. -92 кг вазн тоифасида қатнашаётган Лазизбек бу гал грузиялик Гиорги Тчиладзени мухлислар қаторига кузатиб қўйди.

Ўзининг ажойиб ҳаракатлари билан -60 кг вазн тоифасидаги жангларни «ёндираётган» Мужибилло Турсунов учинчи жангни ҳам муваффақиятли якунлади. Марокашлик Муҳамед Ҳамутга қарши рингга кўтарилган юртдошимиз ушбу ғалабаси билан чорак финал йўлланмасини қўлга киритди.

Шоҳжаҳон Абдуллаев (-86 кг) яна бир босқичдан муваффақиятли ўтди. Қозоғистонлик Сагиндик Тогамбайга қарши баҳс олиб борган юртдошимиз ўзининг аниқ ва кучли зарбалари билан рақибини ожиз қолдириб, чорак финал йўлланмасига эга бўлди.

Бугун ҳам бокс бўйича Ўзбекистон терма жамоасининг 5 нафар вакили рингга кўтарилади. Аҳамиятлиси, барча ҳамюртларимизнинг иштироки Б рингига тўғри келади. Жуфтликлар билан танишинг:

-51 кг: Ҳасанбой Дўсматов - Эрислан Ромеро (Куба) 🇨🇺 (Б ринг, 14:15 дан сўнг)

-71 кг: Саиджамшид Жафаров - Габриел Лланос (Пуэрто-Рико) 🇵🇷 (Б ринг, 14:55 дан сўнг)

-54 кг: Ойбек Жўраев - Ариол Зенели (Албания) 🇦🇱 (Б ринг, 18:25 дан сўнг)

-67 кг: Асадхўжа Мўйдинхўжаев - Кирил Самадурау (Беларус) 🇧🇾 (Б ринг, 19:10 дан сўнг)

-75 кг: Аълохон Абдуллаев - Алмир Мемич (Сербия) 🇷🇸 (Б ринг, 20:10 дан сўнг)