Қозоғистондаги ижтимоий-иқтисодий ислоҳотларни янги босқичга кўтариш учун парламент ислоҳотлари ўтказиш мақсадга мувофиқдир. Бу ҳақда Қозоғистон президенти Қосим-Жўмарт Тўқаев 8 сентябрь куни парламент палаталарининг қўшма йиғилишида мамлакат халқига йўллаган мурожаатномасида гапирди.

“Олий вакиллик ҳокимиятининг ушбу ислоҳоти аввалги барча ўзгаришлар, жумладан, президент ҳокимиятини ислоҳ этиш бўйича саъй-ҳаракатларнинг мантиқий давоми бўлади. 2022 йилнинг июнь ойида бўлиб ўтган умуммиллий референдумда кўпчилик фуқаролар давлатни “Кучли президент – нуфузли парламент – ҳисобдор ҳукумат” концепцияси асосида тубдан модернизациялаш стратегиясини қўллаб-қувватлади. Сўнгги йилларда мамлакатимиз ва ҳатто хорижда рўй берган ҳодисалар ушбу сиёсий курснинг тўғрилигини тасдиқлади. Аммо бир жойда турғун қолиб бўлмайди, мамлакат ва келажак авлод ҳақида ўйлашимиз керак”, – деди Қозоғистон президенти.

Қайд этилишича, 1995 йилда тузилган Қозоғистон парламентининг юқори палатаси (Сенат) мураккаб сиёсий шароитда давлат қурилиши барқарорлигига хизмат қилиб келмоқда.

Қ.Тўқаев яқин келажакда мамлакатда бир палатали парламентни ташкил этиш мақсадга мувофиқлигини таъкидлади.

“Аввалдан огоҳлантирмоқчиман: бу жуда жиддий масала ва уни ҳал этишда шошма-шошарлик кетмайди. Ушбу ислоҳот фуқаролик сектори, экспертлар доираси ва албатта амалдаги парламентда ҳар томонлама тўлиқ муҳокама этилиши керак”, – деди сиёсатчи.

Тегишли баҳс, муҳокамалардан кейин, 2027 йилда бу борада референдум ўтказиш ва Конституцияга керакли ўзгаришларни киритиш мумкин.

“Кўп бора айтганимдек, давлат учун муҳим аҳамиятга эга масалалар фақат халқ розилиги билангина ҳал этилиши керак. Агар бир палатали парламент зарурати бўйича муштарак қарорга келсак, назаримда, бундай парламентни партиялар рўйхати асосида сайлаш лозим бўлади”, – деди Қ.Тўқаев.

Нотиқнинг фикрича, ушбу сиёсий ислоҳот дунёда кенг тарқалган парламентчилик анъаналарига мос келади.