Португалия терма жамоаси ҳужумчиси Криштиану Роналду Осиё Чемпионлар Лигасида «Ан-Наср»нинг «Пахтакор»га қарши ўйинида Тошкентга ташриф буюриши мумкин. Бироқ, португалиялик футболчи ҳали сафар борасида якуний қарор қабул қилмаган, деб хабар беради Offside.kz.

ОФК Элит Чемпионлар Лигасининг тўртинчи тур ўйини 2 ноябрь куни бўлиб ўтади. «Ан-Наср» вакиллари хавфсизлик масалаларини муҳокама қилиш учун «Пахтакор» раҳбарияти билан боғланишган.

Нега Роналдунинг иштироки шубҳа остида?

Футболчининг ташрифига қўшимча эътибор «Ан-Наср»нинг «Нефтчи»га қарши олдинги ўйини билан боғлиқ.

Ўйин яманлик ҳуcийлар томонидан ракета ҳужуми уюштирилиши мумкинлиги ҳақидаги хабарлар фонида бир соат кечикиб бошланди. ОАВ манбаларига кўра, футболчиларнинг мобил телефонларига огоҳлантиришлар келган, шундан сўнг Роналду майдонга тушишдан бош тортган. Клуб раҳбарияти португалияликни ўйнашга кўндириш учун тахминан 40 дақиқа вақт сарфлаган.

Айни пайтда, «Пахтакор» спорт директори Равшан Салимов ижтимоий тармоқлардаги постлари билан мухлисларнинг қизиқишини кучайтирди. У дастлаб «Ан-Наср»нинг ташкилий ишларига қараганда, Роналдунинг Тошкентга келиши кутилганини хабар қилди. 

Бироқ, португалияликнинг ўйинда иштирок этиши ҳақида ҳали расмий тасдиқ йўқ.