The Wall Street Journal нашрининг ёзишича, Россия ва Украина ўртасидаги можарони тинч йўл билан ҳал этиш бўйича навбатдаги музокаралар 2025 йил июнь ойида Ватиканда бўлиб ўтиши мумкин.

Манбаларга кўра, Ватикан раҳбари Папа Лев XIV ушбу музокараларга мезбонлик қилишга тайёрлигини билдирган. Италия Бош вазири Жоржа Мелони ҳам Папанинг бундай ташаббусини қўллаб-қувватламоқда.

АҚШ президенти Дональд Трамп эса Европа етакчилари билан суҳбат чоғида музокараларга давлат котиби Марко Рубио ва Украина бўйича махсус вакил Кит Келлогни юбориш нияти борлигини маълум қилган.

Кремл Ватикандан расмий таклиф келмаганини билдирган бўлса-да, музокаралар ўтказилиши эҳтимолини инкор этмади. WSJʼнинг таъкидлашича, Трамп Россия президенти Владимир Путин ҳали можарони тугатишга тайёр эмаслигини айтган, бироқ барибир музокараларни паст даражада бошлаш тарафдори эканини билдирган.

Музокараларнинг якуни қандай бўлиши номаълум бўлиб қолаётир. Аммо бу ташаббус халқаро ҳамжамиятнинг можарони тинч йўл билан ҳал этишга бўлган интилишини яна бир бор тасдиқлайди.