Президент Трамп Саудия Арабистонида Сурия муваққат президенти Аҳмад ал-Шаръа билан учрашди.

Associated Press агентлигининг ёзишича, бу АҚШ ва Сурия етакчиларининг сўнгги 25 йилдаги илк учрашувидир.

Трамп Саудия Арабистони валиаҳд шаҳзодаси Муҳаммад бин Салмон ва Туркия президенти Ражаб Тоййиб Эрдўғон томонидан кўндирилгач, ал-Шаръа билан учрашишга қарор қилган. Кеча Трамп Сурияга «имконият бериш учун» санкцияларни бекор қилишни режалаштираётганини эълон қилганди.

Туркия президенти Эрдўғон Трамп ва ал-Шаръа музокараларида телефон орқали қатнашган.

Трамп, шунингдек, Сурия етакчисини Исроил билан муносабатларни яхшилаш, чет эллик террорчиларни мамлакатдан чиқариб юбориш, АҚШ билан биргаликда ИШИДнинг қайта тикланишига йўл қўймаслик ва бошқа вазифаларни ўз зиммасига олишга чақирган.

Аш-Шаръа АҚШ, Саудия ва Туркия раҳбарларига миннатдорлик билдириб, мамлакат дунё учун очилишини, Эрон таъсирини камайтиришини қайд этган ҳамда уларни Сурия нефть ва газ соҳасига инвестиция киритишга чорлаган.

Маълумот учун, 2024 йил декабрида Сурияда Башар Асад режими қулаб, «Ҳаят Таҳрир аш-Шом» гуруҳи бошчилигидаги мухолифат ҳокимиятга келганди. Шу тариқа олдин Абу Муҳаммад ал-Жулоний номи билан танилган гуруҳ раҳбари Аҳмад ал-Шаръа Суриянинг муваққат президенти бўлди.