АҚШ Сенати президент Трампнинг ҳарбий ҳаракатлар бўйича ваколатларини чеклашга қаратилган резолюцияни маъқуллади.

Reuters хабарига кўра, ҳужжатга мувофиқ, президент ҳар қандай янги ҳарбий амалиётни Конгресс билан келишиши керак бўлади.

19 май куни ўтказилган овоз бериш жараёнида 50 нафар сенатор ташаббусни қўллаб-қувватлади, 47 нафар сенатор қарши овоз берди. Лойиҳани қўллаб овоз берганлар орасида асосан демократлар ва тўрт нафар республикачи сенатор бўлди.

Ташаббус муаллифлари АҚШ Конституциясига кўра, мамлакатни урушга жалб қилиш ваколати президентга эмас, балки Конгрессга тегишли эканини таъкидламоқда. Агар резолюция кейинги босқичларда ҳам қабул қилинса, Трамп Эронга қарши ҳарбий ҳаракатларни давом эттириш учун Конгресс рухсатини олишига тўғри келади.

Ҳужжат ҳали Сенатдаги асосий овоз беришдан, шунингдек, республикачилар назоратидаги Ваколатчилар палатасидан ҳам ўтиши керак. Бундан ташқари, президентнинг эҳтимолий ветосини бекор қилиш учун ҳар икки палатада учдан икки қисм овоз талаб этилади.

Reuters қайд этишича, республикачилар бунгача шунга ўхшаш еттита ташаббусни Сенатда тўсиб келган. Бу йилнинг ўзида Ваколатчилар палатасида ҳам ҳарбий ваколатларга оид учта резолюция қабул қилинмаган.

Сенат ушбу масалани илк бор 2025 йилда, АҚШнинг Эрон ядровий объектларига зарба бериши ортидан муҳокама қилган эди. Навбатдаги овоз бериш эса 5 март куни, АҚШ ва Исроилнинг Эрон билан можароси кучайганидан кейин ўтказилди.

1973 йилда қабул қилинган АҚШнинг «Ҳарбий ваколатлар тўғрисида»ги қонунига кўра, президент Конгресс рухсатисиз 60 кун давомида ҳарбий ҳаракат олиб бориши мумкин. Шундан сўнг у ё амалиётни тўхтатиши, ёки Конгресс тасдиғини олиши шарт.