Корея Халқ Демократик Республикаси (КХДР) душанба куни АҚШнинг Эрон ядровий иншоотларига берган ҳарбий зарбасини кескин қоралади.

Бу ҳақда Синхуа агентлиги Корея расмий марказий ахборот агентлигига таяниб хабар бермоқда.

«Ҳужум БМТнинг суверенитетни ҳурмат қилиш ва ички ишларга аралашмасликни асосий тамойил сифатида белгиловчи Низомини ва бошқа халқаро қонунларни, шунингдек, уверен давлатнинг ҳудудий яхлитлиги ва хавфсизлик манфаатларини қўпол равишда бузди», – дейилади баёнотда.

У билан бирга «тинчликни сақлаш» ва «таҳдидни йўқ қилиш» баҳонасида Исроил ва Қўшма Штатлар Яқин Шарқдаги кескинликни янада кучайтиргани ва жисмоний кучини намойиш этиб, глобал хавфсизлик тузилмаси учун жиддий салбий оқибатларни келтириб чиыаргани айтилади.

«Халқаро ҳамжамият АҚШ ва Исроилнинг қарама-қарши ҳаракатларини бир овоздан қоралаши керак», – дейилади баёнотда.

Эслатиб ўтамиз, 22 июнга ўтар кечаси АҚШ Эрон ядровий иншоотларига ҳаводан ҳужум қилди. Маълумотларга кўра, Қўшма Штатлар Эронга ҳужум вақтида 30 та Tomohawk ракетаси ва беш-олтита GBU-57 бункер бомбасидан фойдалангани айтилади.

Исроил АҚШнинг Эронга ҳужумларини олқишлади, БМТ Бош котиби ва бир қатор америкалик сиёсатчилар уларни қоралади. Шундан сўнг Теҳрон БМТнинг фавқулодда йиғилишини чақирди ва Исроилга ракета учирди.

Айрим манбалар АҚШ Эрон яқин 48 соат ичида жавоб қайтаришини кутаётганини ёзди.

Бироз олдин вице-президент Венс бу Вашингтоннинг мақсади эмаслигини айтган бўлса-да, Трамп АҚШ Эрондаги сиёсий режимни ўзгартириши мумкинлигини инкор этмади.