Андроид қурилмалар учун Xabar.uz мобил иловаси. Юклаб олиш ×

Япониядаги машҳур Томиока ипак фабрикасига 150 йил тўлди

Япониядаги машҳур Томиока ипак фабрикасига 150 йил тўлди

Япониянинг Томиока шаҳридаги шойи ишлаб чиқариш бўйича давлат саноат фабрикаси ва унга ёндош объектлар «Кунчиқар юрт»да бу турдаги корхоналар орасида энг қадимийси ва энг бут сақлангани ҳисобланади.

Томиоканинг тарихий маркази, Гумма префектураси ҳудудидаги мазкур ноёб корхона мамлакат пойтахти Токио шаҳридан тахминан 100 километр шимоли-ғарбда жойлашган.

Фабрика 1872 йил июлда ишга туширилган бўлиб, уни бунёд этиш ишлари ўшандан бир йил муқаддам бошланган. Қурилиш материаллари ва техник жиҳозлар Франциядан келтирилган. У бутун мамлакатда шу турдаги корхоналар учун намуна бўлиб хизмат қилган. Ўша давр учун энг замонавий бўлган 150 та ускунада бир вақтнинг ўзида 400 киши меҳнат қилган.

1893 йилда фабрика хусусийлаштирилиб, «Mitsui» корхонасига берилган. 1939 йилда эса мулкдор яна ўзгариб, «Katakura Industries Co» компанияси қўлига ўтган.

Фабрика ҳудудидаги тарихий ёдгорликлар ҳозирги давримизга қадар жуда яхши сақлангани сабабли Ҳукумат уни 2005 йилда Япониядаги тарихий ёдгорликлар рўйхатига киритади. Фабрика мажмуаси Шарқий Осиёдаги саноат инқилоблари давридаги дастлабки ва энг яхши сақланган ёдгорлик ҳисобланади ва ўша давр ривожланиш шиддатини ёрқин ифода этиб беради.

Бу ерда тўртта иншоот бор. Тажриба фермасида ипак қуртини етиштириш жараёнлари амалга оширилади. Музлатилган омборда эса қурт уруғи безиён сақланади. Ипак фабрикасининг ўзида ипак толаси ғалтакка ўралгандан кейин қайта ишланади. Шунингдек, бу ердан Ипакчилик технологиясини ўқитиш касбий билим юрти ўрин олган.

Айнан ушбу фабрикада бошланган анъаналар туфайли Япония жаҳондаги энг йирик экспортчилардан бирига айланган. Маҳсулотнинг асосий қисми Франция ва Италияга сотилган. Фабрика 1987 йилга қадар фаолият кўрсатган.

Айнан у туфайли ипакчиликда инновациялар учун яхши шароитлар яратилди, экспорт маҳсулоти сифати ва ҳажмлари кескин ошди. Натижада 1909 йилга келиб, Япония ипак хом-ашёсини экспорт қилиш бўйича Хитойдан ўзиб, жаҳонда етакчига айланди.

Бу ерга келаётган сайёҳлар Японияда ипакчилик саноати тарихи билан яқиндан танишиш, қадимий жиҳозларда ўзлари ипак толасини олиш имкониятига эга бўладилар.

2014 йил 21 июнда фабрика ЮНЕСКОнинг Бутунжаҳон моддий мероси рўйхатига киритилди. Шу тарзда у ушбу рўйхатдан жой олган Япониядаги 18 та объектдан бирига айланди.

Сарвиноз Аҳмедова,
журналист

Изоҳлар

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг