АҚШ президенти Доналд Трамп Украинадаги урушни тўхтатиш орқали жаннатга киришга умид қилишини айтди.

«Агар бир ҳафтада 7 000 кишини ўлимдан қутқара олсам, ўйлайманки, бу ёмон натижа эмас. Имкони бўлса, жаннатга тушишни истайман... Агар жаннатга кирсам, бу (урушни тўхтатиш назарда тутилмоқда — таҳр.) асосий сабаблардан бири бўлади», — деди Трамп Fox News телеканалига берган интервюсида.  

У, шунингдек, Ҳиндистон ва Покистон ўртасидаги қуролли зиддиятни тўхтатганини ҳам урғулаган.

Маълумот ўрнида: Трамп жорий йил 15 август куни Аляска штатида россиялик ҳамкасби Владимир Путин билан Украинадаги уруш масаласида музокара ўтказди. Трампнинг ўзи Fox News телеканалига берган интервюсида Путин билан учрашувга 10 баллик тизимда 10 балл қўйишини айтиб мақтанди. Аммо таҳлилчилар Путин Трампни доғда қолдирганини айтмоқда.

Жаннатга кириш ҳақидаги баёнот юзасидан изоҳ берган Оқ уй матбуот котиби Кэролайн Левитт Трампнинг фикри ҳазил эмаслигини очиқлади.

«Ўйлашимча, президентнинг фикри жиддий. Президент ушбу хонада ўтирган барча одамлар каби жойи жаннатда бўлишини истайди»,  — деди Оқ уй матбуот котиби. 

79 ёшли Трамп марҳума онаси жаннатда эканига ишончи комил экани, отаси борасида эса аниқ фикр айтолмаслигидан баҳс этган.

Трамп 2016 йилги президент сайловида ҳам ўзининг жаннатга кириш имкониятини эсга олганди. Ўшанда республикачи сиёсатчи сайловдаги ғалаба ва президент сифатида яхши ишлаш «жаннатга киришнинг эҳтимол ягона йўли» эканини айтган.

Трамп ҳозирга қадар 6 та уруш — Арманистон ва Озарбайжон, Исроил ва Эрон, Ҳиндистон ва Покистон, Камбожа ва Таиланд, Миср ва Эфиопия, Сербия ва Косово ўртасидаги зиддиятларни бартараф этганини даъво қилиб келади. Ушбу хизматлари эвазига у жаннатдан ташқари, тинчлик йўлидаги Нобел мукофотига ҳам лойиқ эканини очиқ айтмоқда.

Тарафдорлар уни «тинчликсевар президент» деб мақтамоқда. Мухолифлари эса Ғазо секторида минглаб тинч аҳоли ўлдирилаётган бир пайтда Исроилни қуроллантиришда давом этаётгани сабаб кескин танқид қилмоқда.

Насроний динига мансуб Доналд Трамп ҳаёти давомида эътиқодини христианликнинг турли йўналишларига ўзгартирган. Айни пайтда эса у конфессиялардан холи насроний ҳисобланади.