АҚШ президенти Дональд Трампга жума куни Оқ уйда шифохонага ётқизилгунга қадар кислород беришган, дея хабар берди «ABC News» телеканали ўз манбаларига таяниб.

«Манбалар — Трампга яқин инсонларнинг хабарига кўра, президентнинг нафас олиши билан боғлиқ муаммолари бўлган. Жума куни Оқ уйда кислород даражаси пасайиб кетгандан сўнг у қўшимча кислород олган», — дея маълум қилган телеканал.

Матбуот анжуманида Трампнинг шифокорлари унга кислород беришдими, деган саволга жавоб беришдан ўзларини олиб қочишган ва айни вақтда унга кислород берилмаётганини маълум қилишган.

Шанба куни Трампнинг шифокорлари, у ўзини жуда яхши ҳис қилаётганини, кислородга эҳтиёжи йўқлигини, бир кундан бери иситмаси чиқмаётганини, фақат чарчоқ билан озроқ йўтал борлигини айтишганди.

Шунга қарамай, коронавирус билан касалланиб қолган АҚШ президентининг аҳволидан бохабар киши Дональд Трампнинг ўтган кундаги кўрсаткичлари «хавотирли» эканлигини журналистларга маълум қилган. Бу эса шифокорларнинг расмий фикрига зиддир. Телеканалнинг манбаси тиббиётга алоқаси бор-йўқлиги номаълум.

Президентнинг шифокори Шон Конли Трампнинг тузалиш жараёнидан жуда мамнун эканлигини билдирган.