Украинанинг Анқарадаги элчиси Наримон Жалол Туркия матбуотига берган интервьюсида Россия ишғоли остидаги Қримнинг келажагини башорат қилди.

Озарбайжон Республикаси ўз ҳудуди – Қорабоғни қайтариб олганини эслатган дипломат Украина ҳам халқаро иттифоқчилар кўмагида Қримни қайта ўз ҳудудига қўшиб олиши ва адолатни тиклашига ишонч билдирган. 

Наримон Жалол Қримда сиёсий қатағон давом этаётгани, жумладан, 300 дан зиёд сиёсий маҳбус қамоқда қолаётганини қайд этган. 

Элчининг фикрича, Россия ҳукумати Қрим яриморолида аҳолини мажбуран руслаштириш ва туб аҳолини ҳудуддан сиқиб чиқариш сиёсатини юритмоқда. Асирлар ва дараксиз йўқолган ҳақидаги маълумотлар яширилмоқда.

Рус босқинига тўхталган Украина элчиси Россиянинг ракета ва дрон зарбалари оқибатида биргина жорий йил июль ойида мамлакатда 437 нафар тинч аҳоли вакили ҳалок бўлгани, 2500 киши жароҳатланганини айтган. 

Дипломат Қора денгиздан Россия ҳарбий кемалари ўтишига йўл қўймаётгани ва мудофаа саноатига кўмак кўрсатаётгани учун Туркия ҳукуматига миннатдорлик билдирган. 

Маълумот ўрнида: Туркия раҳбарияти халқаро ҳуқуқ талабига мувофиқ Қрим Украинага қайтарилиши шартлигини таъкидлаб келади. 

Украина таркибидаги Қрим мухтор республикаси ва Севастополь шаҳри 2014 йил февраль-март ойларида Россия таркибига қўшиб олинган эди. Халқаро ҳамжамият Украина ҳудудлари ноқонуний равишда тортиб олинганини қоралаган.

Украина президенти Владимир Зеленский Россия ҳар қанча уринмасин, мағлубиятга учраши ва Қрим ҳам қайтариб олиниши ҳақида баёнот берган. 

Зеленский ўтган йили АҚШ президенти Дональд Трампнинг Қримдан воз кечиш орқали можарони тўхтатиш таклифини ҳам рад этганди. 

Amnesty International ташкилоти Қрим аннексиясининг 10 йиллиги муносабати билан чоп этган ҳисоботида Россия ҳукумати яриморолнинг этник таркибини ўзгартиришга уринаётгани ҳақида бонг урганди. Тадқиқотга кўра, Россия ўтган йиллар мобайнида Қримдаги украин ва қрим татарлари ҳақ-ҳуқуқларини поймол қилиб келмоқда. Бундан кўзланган мақсад бу икки миллатнинг ўзлигини маҳв этиш деб баҳоланган.