Хитойнинг Хэбэй провинцияси Нэйцю уезди полицияси Уханга борганини яширган аёлга нисбатан иш қўзғатди, деб ёзади «РИА Новости».

Жума куни унга янги типдаги коронавирус чақирган зотилжам ташхисини қўйишди. У 77 нафар инсон, жумладан, шифохона ходимлари билан яқин муносабатда бўлган.

Аёлнинг фамилияси — Лю, у 64 ёшда. 17 январь куни у турмуш ўртоғи, қизи, куёви ва неваралари билан Ухандан Нэйцюга қайтиб келишади. 31 январь куни унинг нафас олиши қийинлашади ва шифохонага ётади. У ва оиласи Уханга борганини 6 февралгача яшириб келишади.

Ҳукумат изоляция чораларини кўрди: Нэйцюдаги анъанавий Хитой табобати клиникасини, Цяодун туманидаги стоматология клиникасини ҳамда бемор бўлган ва яшаган ҳамма жойларни ёпди.

Бир кун олдин Хитой шарқидаги Фуцзянь провинциясида коронавирусни юқтирган эркакни қўлга олишди. У ҳам Уханга борганини яшириб келган. Қайтиб келгач бир қанча оммавий тадбирларда иштирок этган. У туфайли қарийб 4 минг киши карантинга тушган, улардан 7 нафари коронавирусни юқтиришга улгурган.