1990 йилда экранга чиққан «Уйда ёлғиз» фильми бутун дунёга машҳур бўлди. У болалик хотиралари, байрамона кайфият ва беқиёс ҳазил-мутойиба рамзига айланди. Фильмнинг муваффақиятига улкан ҳисса қўшган қаҳрамонлар эса, Кевин билан бирга яна икки нотавон, аммо ҳаддан ташқари «шафқатсиз» ўғрилар Гарри ва Марвдир. Уларни ижро этган актёрлар Жо Пеши ва Даниел Стерн экрандаги қаҳрамонларидан фарқли ўлароқ, ўзига хос ҳаёт йўлини танлаган инсонлардир.

Жо Пеши: қаттиққўл тимсол ортидаги ёпиқ инсон

Жозеф Франк Пеши 1943 йил 9 февралда Нью-Жерси штатининг италян муҳожирлари оиласида туғилган. У кино тарихида, асосан, жаҳлдор, кескин ва қаттиққўл қаҳрамонлар орқали танилган. Аммо шахсий ҳаётида сокинлик ва ёпиқлик устувор бўлган.

Пеши ҳаёти давомида бир неча бор уйланган, аммо никоҳлари оммадан ҳамиша узоқ сақланган. Пешининг бир қизи бор ва ота унинг ҳаётини оммадан ҳимоя қилишни ўз бурчи деб билади. Пеши камдан-кам интервью беради.

Жо Пеши кино тарихида, айниқса, гангстер ва жиноий дунё қаҳрамонларини ўта ишончли ва таъсирли ижро этган актёр сифатида танилган. Унинг актёрлик услуби кескинлик, ички портлаш ва назоратсиз ҳиссиёт билан ажралиб туради.

1980 йилда Мартин Скорсезе томонидан суратга олинган «Дарғазаб буқа» фильми Пешининг карьерасида бурилиш ясади. Бу фильмда у Жейк ла Моттанинг яқин дўсти ва менежери Жои ла Мотта ролини ижро этди ва танқидчилар эътиборини тортди.

1990 йилда экранларга чиққан машҳур «Яхши йигитлар» фильмида Пеши Томми де Вито образи билан намоён бўлди. Бу роль унга «Оскар» мукофотини олиб келди. Томми – зўравон, «портловчи» феъли билан кино тарихидаги энг қўрқинчли ва таъсири кучли қаҳрамонлардан бири ҳисобланади.

Комедия жанрида эса Пеши «Менинг аммаваччам Винни» (1992) фильмида ноодатий, бир оз содда, аммо зукко адвокат Винни Гамбини ролини ижро этиб, мутойибага мойил томонини яна бир бор исботлади.

Шунингдек, у «Қиморхона», «Қотил қурол», «Ирландиялик» фильмларида ўйнаган.

1990-йил ўрталаридан актёр ихтиёрий равишда Ҳолливуддан бир қадам четга чиқди. У шон-шараф, алвон йўлаклар ва доимий диққат-эътибордан кўра, тинч ҳаётни афзал кўрди. Бу даврда мусиқа, айниқса жазга янада яқинлашди ва ўзини ижодий сукут қўйнида сақлашга интилди. Пеши учун актёрлик фаолияти касб бўлса, шахсий ҳаёт – дахлсиз ҳудуддир.

Даниел Стерн: сокинликни танлаган ижодкор

1957 йил 28 августда Мэриленд штатда туғилган Даниел Якоб Стерн экранда содда ва миқтидан келган Марв образи билан машҳур бўлди. Ҳаётда эса у мутлақо бошқача инсон – чуқур фикрлайдиган, оилапарвар ва кўп қиррали ижодкор сифатида танилган.

Даниел Стерн кино фаолиятини драматик роллар билан бошлаган. 1979 йили у «Узилиш» фильмида асосий қаҳрамонлардан бирини ўйнади. Мазкур киноасар «Оскар» мукофотига сазовор бўлди ва Стерннинг жиддий актёр сифатидаги имкониятларини намоён этди.

Кейинчалик у «Шаҳарлик нозиклар» фильмида (1991) самимий ва ҳаётий қаҳрамон образини яратди. Бу роль унинг комедия жанридаги муваффақиятларидан бири бўлди.

Телевидение орқали эса Стерн миллионлаб томошабинларга «Мўъжизали йиллар» сериали билан яхши таниш. Актёр унда бош қаҳрамоннинг катта ёшдаги овози – ҳикоячи сифатида иштирок этган. Бу овоз унинг актёрлик карьерасида алоҳида ўрин тутади. Стерн, шунингдек, «Ўрмонда қолиб кетган», «Жуда ёмон ишлар», «Мовий осмон» ва бошқа фильмларда ҳам иштирок этган.

Стерннинг роллари кўпинча соддалик ортидаги инсонийлик, ички кураш ва ҳаётий ҳазил-мутойиба билан бойитилган.

Дениел Стерн узоқ йиллардан бери рафиқаси Лорелл Стерн билан барқарор ва осойишта оилавий ҳаёт кечириб келади. Уларнинг уч нафар фарзанди бор. Актёр кўп бор таъкидлаганидек, ҳаётидаги энг муҳим роль, бу – ота ролидир.

1990-йиллардан сўнг Стерн ҳам онгли равишда Ҳолливуд шов-шувидан чекинди. У Калифорнияда сокин ҳаётни танлаб, табиат билан уйғун яшашга ҳаракат қилди. Фермерлик билан шуғулланиб, кундалик ҳаётни оддий меҳнатга бағишлади. Маълум вақт ўтгач, Стерн ўзини бошқа ижодий йўналишларда ҳам синаб кўрди – ҳайкалтарошлик ва рассомчиликка жиддий киришди. У яратган бронза ҳайкаллар АҚШнинг бир қатор шаҳарларидаги жамоат жойларида ўрнатилиб, санъат шинавандаларига намойиш этилди.

Икки қаҳрамон, икки ҳаёт йўли

Икки ўғри – Гарри ва Марв «Уйда ёлғиз» фильмига жон киритиб, томошабинни ҳозиргача кулдиради. Бу қаҳрамонларни ижро этган актёрларни боғлаб турган умумий жиҳат – санъатга сидқидилдан ёндашишдир.

Жо Пеши ва Даниел Стерн нафақат истеъдодли актёр, балки ўз ҳаёт танлови билан ҳам ҳурматга сазовор инсонлар сифатида кино тарихида қолади.

Акбар Фатҳуллаев