Бельгияда юқори лавозимли раҳбар ҳукумат ковидга қарши сотиб олган вакциналарнинг нархлари ҳақидаги махфий маълумотни бехосдан ҳаммага ошкор қилиб қўйди.

HLN (Бельгия) ахборот портали ёзишича, бюджет ва истеъмолчиларга хизмат кўрсатиш бўйича давлат котиби Ева де Блеекар ёзган твитда ҳукумат сотиб олган вакциналарнинг қийматлари ҳамда Бельгия булар учун ишлаб чиқарувчиларга қанча маблағ тўлаши кўрсатилган.

Маълум бўлишича, Бельгия бу йил 33 миллионта вакцина харид қилади ва ҳукумат бунинг учун 280 миллион евро сарфлайди. Твитга илова қилинган жадвалдан кўриниб турибдики, «AstraZeneca» вакцинасининг битта дозаси — 1 евро 78 цент. Бу вакциналарнинг энг арзони. Энг қиммат вакцина «Moderna» — битта дозаси 18 доллар туради.

Таъминотчилар билан келишувга мувофиқ, Еврокомиссия вакциналарнинг нархларини сир тутиш мажбуриятини олган, шу боис юқоридаги твитни дарҳол ўчириб ташлашди. Аммо маълумот тарқалишга улгурди, вакциналарнинг ҳақиқий нархларини энди ҳамма билади.