Украина президенти Владимир Зеленский Туркияда Россия билан юзма-юз музокараларга тайёр бўлганини, бироқ Россия раҳбари Владимир Путин бундай мулоқотдан бош тортганини таъкидлади.

«Кеча мен Анқарада бўлдим. Президент Эрдўған билан учрашдим ва унинг ёрдами, меҳмондўстлиги учун миннатдорчилик билдираман. Мен Путин билан тўғридан-тўғри Анқарада ёки Истанбулда учрашишга тайёр эдим — наfaқат учрашиш, балки барча долзарб масалаларни муҳокама қилиш учун. Аммо у бунга рози бўлмади», – деди Зеленский.

Унинг таъкидлашича, Истанбулга келган Россия делегацияси музокараларда реал қарор қабул қилиш ваколатига эга бўлмаган шахслардан иборат бўлган.

«Бу делегацияда Россияда ҳақиқатан ҳам қарор қабул қиладиган бирорта шахс йўқ эди. Шунингга қарамай, мен Украина мудофаа вазири бошчилигидаги делегацияни Истанбулга жўнатдим. Мақсад — Россия томонида ҳақиқий музокара юритиш истаги ва ваколат бор-йўқлигини аниқлаш эди», – дейди Украина президенти.

Зеленский, шунингдек, Украина урушни тугатиш учун барча реал чораларни кўриб чиқишга тайёр эканини билдирган.

«Мен Путин делегациясига реал ваколатлар беришга журъат топишига умид қиламан. Кун давомида Истанбулда бўлаётган музокараларнинг ҳар бир босқичи, Россия томонидан урушни тўхтатиш йўлида амалий қадамлар қўйилиши борасида жамоатчиликни хабардор қилиб бораман», – дея якунлади у.