Украина президенти Владимир Зеленский Россия президенти Владимир Путинга Францияда бўлиб ўтадиган «Катта еттилик» (G7) саммити доирасида учрашишни таклиф қилган. Бу ҳақда у Киев-Печерск лаврасига ташрифи чоғида журналистларга маълум қилди.

«Биз Путин билан G7 саммити вақтида учрашишга тайёр эканимиз ҳақида хабар юбордик. Чунки у ерда Трамп ва Макрон бўлади, яъни европаликлар ва Америка. Менимча, бу барчанинг биргаликда учрашиши учун жуда яхши имконият. Европа ва АҚШ бунга рози бўлди, аммо Россия яна бир бор музокараларга тайёр эмаслигини намойиш этди», — деди Зеленский.

«РБК-Украина» манбасига кўра, Зеленский ва Путин учрашувини ўтказиш таклифи Украина томонидан бир неча каналлар — воситачилар, дипломатлар ва разведка хизматлари орқали етказилган.

Манбанинг таъкидлашича, Россия томонидан бу таклифга аниқ жавоб берилмаган.

«Катта еттилик» саммити 15-17 июн кунлари Франциянинг Женева кўлининг жанубий соҳилида жойлашган Эвиан-ле-Бен шаҳрида бўлиб ўтади.

4 июн куни Зеленский Путинга очиқ мактуб эълон қилган эди. Унда у Россия президентига урушни якунлаш бўйича келишувга эришиш мақсадида шахсан учрашишни таклиф қилган.

Орадан бир кун ўтиб, Путин Санкт-Петербург иқтисодий форумидаги нутқи давомида ҳозирги пайтда Зеленский билан учрашишдан маъно кўрмаётганини айтган.

Путин, шунингдек, Зеленский очиқ мактубни эълон қилишидан бир неча ҳафта олдин россиялик тадбиркорлардан бири орқали шахсий учрашув ташкил этишни сўраганини маълум қилган. Кейинчалик бу тадбиркор Роман Абрамович экани маълум бўлди.