Украина президенти Владимир Зеленский 21 декабрь куни АҚШга сафар қилди. 300 кундан буён давом этаётган уруш мобайнида илк бор хорижга чиққан Зеленскийнинг океанорти сафарини ташкил этиш учун мисли кўрилмаган хавфсизлик чоралари, жумладан, Россия хавфсизлик кучларини чалғитувчи усуллар қўллангани маълум бўлди.

20 декабрь, сешанба куни Зеленский фронтга – Бахмут шаҳрига борган. Тунда махфий равишда Польшага олиб борувчи поездга ўтирган. Россия ракеталари уриб тушириш хавфи юқори бўлгани сабабли Украина раҳбари самолёт эмас, поезддан фойдаланишни маъқул кўрган. Польшадан эса Вашингтонга АҚШ ҳарбий ҳаво кучларига тегишли «Боинг» самолётида парвоз қилган. Зеленский ўтирган учоқни НАТОнинг разведкачи самолёти ва F-15 қирувчиси кузатиб борган. Деярли бир сутка давом этган йўлчиликдан сўнг у Вашингтонга етиб борган.

Ташриф тафсилотлари бир неча ой давомида муҳокама этилгани аниқ. Аммо Россия босқинига қарши курашаётган мамлакат раҳбарининг сафари хавфсизлик нуқтаи назаридан сир тутилган. Зеленскийнинг Оқ уй хўжайини билан учрашиши ҳақидаги хабар ташриф арафасида, 20 декабрь кечқурун пайдо бўлди.

ОАВга кўра, Украина раҳбарига ҳатто АҚШ ҳудудида ҳам Россия кучлари зарар етказиши эҳтимоли инобатга олиниб, кучайтирилган хавфсизлик чоралари кўрилган.

Владимир Зеленский 21 декабрь куни Оқ уйда президент Жо Байден билан музокара ўтказди. Сўнг шу куннинг ўзида Конгрессда нутқ сўзлади.

Сиёсатчи Украина нафақат ўз суверенитети, балки глобал хавфсизлик ва демократия учун курашаётганини таъкидлаб, АҚШдан кўпроқ молиявий кўмак ажратишни сўради. У, шунингдек, Украина ҳеч қачон таслим бўлмаслигини ҳам таъкидлади.

1941 йил 26 декабрь куни гитлерчиларга қарши курашаётган мамлакат етакчиси – Буюк Британия бош вазири Уинстон Черчилль Конгрессда тарихий нутқ ирод қилган эди. Айрим таҳлилчилар Зеленскийнинг АҚШ қонун чиқарувчи идорасидаги чиқишини Черчиллнинг 81 йил аввалги машҳур нутқи билан муқояса этмоқда.