Ўзбекистон Республикаси ва Хитой Халқ Республикаси билан барча соҳаларда бўлгани каби экология, атроф-муҳитни муҳофаза қилиш ва иқлим ўзгариши соҳасида ҳам изчил ва самарали ҳамкорлик йўлга қўйилган.

Маълумот учун, 2007 йил 3 ноябрда Хитой Халқ Республикаси Атроф-муҳитни муҳофаза қилиш давлат бошқармаси билан ўзаро англашув меморандуми имзоланган. 2019 йилда эса Орол денгизи халқаро инновация маркази (ИИС) ва Хитой Фанлар академияси (ХИEГ) қошидаги Шинжон Экология ва география институти ўртасида Орол денгизи минтақасида илмий ҳамкорликни ривожлантиришга борасида келишувга эришилган.

Хитой Халқ Республикаси қум бўронлари ва чўлларни назорат қилиш бўйича миллий кенгаши раиси Ан Фендзининг Самарқандда ўтказилган (СРИС-21) — БМТнинг чўлланиш тўғрисидаги конвенцияси ижросини кўриб чиқиш қўмитасининг 21-сессиясида иштирок этиши ўзаро ҳамкорликни мустаҳкамлаш борасидаги яна бир муҳим қадамга айланди.

Таъкидлаш жоизки, Ан Фендзи ва Экология вазири Азиз Абдуҳакимов ўртасидаги учрашувда ерларнинг деградацияси ва барқарор ер бошқаруви бўйича тадқиқотлар олиб бориш, жумладан, тажриба алмашиш ва Ўзбекистоннинг чанг ва қум бўронлари хавфи юқори бўлган ҳудудларида қўшма илмий-тадқиқот фаолиятини амалга ошириш масалалари муҳокама қилинди. Якунда чўлланиш ва ерларнинг деградациясига қарши курашиш соҳасида илмий-амалий ҳамкорлик тўғрисида Меморандум ишлаб чиқиш ва имзолаш орқали тез орада яқин ҳамкорликни йўлга қўйиш бўйича келишувга эришилди.

Шунингдек, 2023 йилда Экология вазирлиги ходимлари Хитойда тажриба алмашиш бўйича ўқув дастурларида иштирок этишди, бу эса ходимларга ўз билим ва кўникмаларини кенгайтириш имконини берди. Қолаверса, бугунги кунда Хитой билан Шанхай Ҳамкорлик Ташкилоти (ШҲТ) ҳамда Қор қоплони ва унинг экотизимини сақлаш бўйича глобал дастур (ГСЛEП) каби халқаро платформалар доирасида ҳамкорлик қилинмоқда. Қолаверса, ХХР билан атроф-муҳитни муҳофаза қилиш соҳасида ҳамкорлик тўғрисидаги Битим лойиҳаси ишлаб чиқилмоқда.

Маълумот учун, Хитой унумдор тупроқларни табиатнинг салбий таъсиридан ҳимоя қилишга ёрдам берувчи экологик лойиҳаларни амалга ошириш бўйича етакчи давлатлардан бири ҳисобланади. Чўлланишга қарши курашиш ва экотизимларни тиклашда ҳам катта тажрибага эга. Хусусан, сўнгги 10 йилда “Уч шимол” лойиҳаси доирасида ўрмонлар майдони 33,3 миллион гектардан ортиқроққа кўпайди.

Эслатиб ўтамиз, аввалроқ Хитойдан Ўзбекистонга илк бор чиқинди ташийдиган электромобил олиб келинди. Шунингдек, Хитой ва Ўзбекистон Савдо-саноат палатаси вакиллари билан экологик тоза бинолар қуриш ва чиқиндиларни қайта ишлаш масалалари муҳокама қилинди.