«Харид қил, кўпроқ истеъмол қил» деб бақиради. Рекламалар, блогерлар, ҳатто дўстлар, қариндошлар ҳам, гўёки одамлар бир-бирини ҳаваслантириш, ҳасадлантириш ёки замонавий тилда айтганда мотивация бериш учун пойга ўйнаётгандек: янги гаджетлар, мода кийимлар, ресторанлар, зиёфат ва гап-гаштаклар. Ҳаётнинг мана шу ғилдирагида айланмасангиз гўёки замондан орқада қолиб кетгансиз.

Қачон охирги марта чиндан ҳам сизга керак бўлмаган бирор нарсани сотиб олдингиз? Балки у охирги модадаги курткадир ёки уйингиздаги учинчи чойнак, бешинчи сумка. Ўша пайт ўзингизни яхшироқ ҳис қилгандирсиз. Лекин ортидан нима келди? Янги хариддан сўнгги ўша тўла-тўкислик ҳисси қанчагача етди? Ортиқча нарсалар – ортиқча муаммолар ва кўраяпмизки моддий бойлик бахт олиб келмайди, нима учун?

Пул топиш қийин, аммо уни сарфлаш жуда осон. Биз ортиқча нарсаларни сотиб олиш учун кўп ишлаймиз. Кераксиз харажатни енгиш учун эса «Дидро эффекти»ни тушуниш керак.

Минимализм фақат керакли ва қувонч келтирадиган нарсадан фойдаланиш дегани. Агар сиз ҳаётингизни соддалаштирмоқчи бўлсангиз кўп нарсадан воз кечинг.

Бугунги «минимализм» нафақат санъатда, балки ҳамма нарсада намоён бўлмоқда: кийим услуби, турмуш тарзи, уйларни безатиш... ҳатто овқатланишда.

Уйингиздаги йиллаб ишлатилмаётган буюмлардан воз кечиш ҳақида ўйлаб кўрганмисиз? Умрингиз давомида машаққат билан топган пулингизни мана шундай бир неча йиллаб ишлатилмайдиган буюмлар учун сарфлаганингиз ҳақидачи? Агар шундай бўлса, демак сиз кераксиз буюмлар учун меҳнат қилаётган бўлиб қолмаяпсизми?