Вазирлар Маҳкамасининг 29.04.2019 йилдаги 365-сон қарори билан Давлат божхона қўмитасининг Божхона институтига ўқишга қабул қилиш тартиби белгиланди. Бу ҳақда «Норма» хабар берди.

«Божхона иши» ва «Юриспруденция» йўналишлари бўйича бакалавриатга қабул бир нечта босқичда: дастлабки танлов; махсус касбий танлов; тест синовлари орқали ўтказилади. 

Аризалар 1 январдан 1 апрелгача қабул қилинади.

Дастлабки танлов қуйидаги тадбирларни ўз ичига олади:

• ҳужжатларни тўплаш ва ўрганиш;
• якка тартибда суҳбатлашиш;
• индивидуал-психологик ўрганиш;
• умумжисмоний тайёргарлик даражасини баҳолаш;
• тиббий кўрикдан ўтказиш.

Махсус касбий танлов 25 июнгача ўтказилади ва қуйидаги тадбирларни ўз ичига олади:

• психофизиологик ўрганиш;
• тиббий кўрикдан ўтказиш;
• ёзма иш (диктант);
• компьютер техникаси ва ахборот-коммуникация технологиялари бўйича билим даражасини текшириш;
• якка тартибдаги якуний суҳбат.

Тест синовлари 5 июлгача ўтказилади.

Ушбу олий ўқув юртининг магистратурасига ўқишга қабул қилиш тартиби алоҳида низом билан тасдиқланган.

Ҳужжат Қонун ҳужжатлари маълумотлари миллий базасида эълон қилинган ва 30.04.2019 йилдан кучга кирди.