Ҳиндистон бош вазири Нарендра Моди Россия президенти Владимир Путин билан учрашувда Украина урушини тўхтатиш лозимлигини таъкидлади. Икки давлат раҳбари 31 август куни Қирғизистон пойтахти Бишкек шаҳрида ШҲТ саммити арафасида учрашган.

«Урушнинг ҳар бир куни инсониятни ортга улоқтирмоқда. Биз охири йўқ урушни тугатиш босқичига ўтишимиз керак. Ҳиндистон шундай мужда йўллайди. Биз туганмас урушни эмас, балки урушнинг тугашини истаймиз», – деган Ҳиндистон бош вазири Россия президентига.

Нарендра Моди Украинадаги зиддиятни тинч йўл билан бартараф этишга қаратилган барча саъй-ҳаракатларни қўллаб-қувватлашини ҳам қайд этган.

Эътиборга молик жиҳати, Моди ва Путин Россия томонидан Украинага қарши бошланган кенг қамровли босқинчилик урушининг 1650-куни учрашган.

«Катта раҳмат, ҳурматли бош вазир. Биз айнан шу йўлда ҳаракатланмоқдамиз», – деган Путин Ҳиндистон бош вазирининг урушни тўхтатиш хусусидаги даъватига жавобан.

Путин «айнан шу йўлда» деганда нимани назарда тутгани аниқ эмас.

Россия Украина ҳудудига бостириб кирган дастлабки ойларда Ҳиндистон бетараф мақомда туришга уринган. Ҳам Вашингтон, ҳам Москва билан стратегик ҳамкорликка эга мамлакат Ғарб босимига қарамай, Россия тажовузини қоралашдан тийилган.

Аммо кейинги вақтларда Ҳиндистоннинг Украина уруши борасидаги позицияси ўзгарди. Деҳли Москвани қуролли зиддиятни мулоқот йўли билан ҳал этишга чақира бошлади.

Аввал хабар берганимиздек, бош вазир Нарендра Моди 2024 йил июл ойида Кремлдаги музокарада ҳам Путинга «уруш ечим эмас»лигини уқтирганди.

«Бомбалар, ракеталар, милтиқлар тинчликни таъминлай олмайди. Шунинг учун биз мулоқотга эътибор қаратамиз ва мулоқот зарур», – деган эди Моди. 

Нарендра Моди Москвадаги мулоқотда рус армияси сафида Украинага қарши урушда қатнашаётган Ҳиндистон фуқаролари масаласини ҳам кўтарганди. Ўшанда Путин Модининг талабига ён берган ва  Россия армияси таркибида жанг қилаётган Ҳиндистон фуқароларини ватанига қайтаришга розилик билдирган эди.