23-июл куни давлат олий ва касбий таълим муассасаларига 2026/2027-ўқув йили учун қабул тест синовлари якунланди. Бу ҳақда Билим ва малакаларни баҳолаш агентлиги маълум қилди.

Қайд этилишича, тест синовларининг сўнгги — ўнинчи кунида республика бўйича режалаштирилган 45 минг 520 нафар абитуриентдан 45 минг нафардан ортиғи иштирок этган. Ушбу кунда тест топшириш тартибини бузганлар қайд этилмаган.

Ўн кун давом этган тест синовларида жами 664 минг 609 нафар абитуриент иштирок этиши режалаштирилган бўлиб, улардан 610 минг нафардан ортиғи имтиҳонларда қатнашган. Тест синовлари қоидаларини бузган 70 нафардан ортиқ абитуриент эса жараёндан четлатилган.

Маълум қилинишича, тест синовларининг 10-кун натижалари 24-июл куни эълон қилинади. Шундан сўнг абитуриентлар 25-июлдан 8-августга қадар иккинчи босқич танловида иштирок этиб, олий таълим муассасалари, таълим йўналишлари, устуворликлар ва таълим шаклларини танлаши мумкин.

Якуний мандат натижалари эса иккинчи босқич танлови якунланганидан кейин бир ҳафта ичида эълон қилинади.