Toshkent shahridagi «MMFI» Milliy tadqiqot yadro universiteti filiali bitiruvchi talaba qizlari Xalqaro atom energiyasi agentligi (MAGATE) tomonidan taqdim etiladigan Mariya Sklodovskaya-Kyuri nomidagi stipendiya dasturi g‘oliblari qatoriga kirdi. Mazkur dastur yadro sohasi bo‘yicha eng nufuzli xalqaro ta’lim grantlaridan biri hisoblanadi. Stipendiya yadro fizikasi, muhandislik va shu kabi texnik yo‘nalishlarda tahsil olayotgan talaba qizlar uchun mo‘ljallangan.

Filial matbuot markazi ma’lumotiga ko‘ra, so‘nggi ikki yilda MAGATE stipendiyasiga sazovor bo‘lgan o‘zbekistonliklar orasida Anna Zubkova, Hulkar Rashidova, Dilfuza Tojibayeva va Sarvina Ahrorova kabi talabalar bor. Har bir stipendiat o‘z yo‘lini bosib o‘tgan. Masalan, Hulkar Rashidova filialda bakalavriatni tamomlagandan so‘ng, Xitoyning yetakchi texnik universitetlaridan biri — Sinxua universitetida magistraturaga o‘qishga kirdi. Anna Zubkova hozirda «Yadro energetikasi va issiqlik fizikasi» yo‘nalishi bo‘yicha MMFI MTYaUning Moskvadagi bosh kampusida tahsil olmoqda. Bu universitet yadro ta’limi va texnologiyalari bo‘yicha dunyodagi yetakchi besh oliygoh qatoriga kiradi. Sarvina Ahrorova esa Fransiyadagi Politexnik instituti magistraturasida tahsilni davom ettirmoqda.

– Maktabda fizika va matematika menga juda yoqardi. Shuning uchun aniq fanlar bo‘yicha o‘qishni davom ettirishni istadim. Texnik universitetlar haqida izlana boshladim. Ayni paytda yurtimizda atom energetikasi rivojlana boshladi, AES qurilishi rejalashtirildi va Toshkentda MMFI MTYaU filiali ochildi. Shunda men bu sohada ishlashni xohlashimni angladim – bu men uchun yangi va qiziq yo‘nalish edi. «Yadro fizikasi va texnologiyalari» bo‘yicha bakalavr darajasini olgach, magistraturada o‘qishni davom ettirishga qaror qildim, – deydi Anna Zubkova.

Uning so‘zlariga ko‘ra, MAGATE stipendiyasi unga ta’lim va kasbiy rivojlanishga to‘liq e’tibor qaratish imkonini berdi. U ushbu mablag‘ni o‘quv resurslari va malaka oshirish kurslariga yo‘naltirishni rejalashtirmoqda.

MAGATE ma’lumotlariga ko‘ra, 2020-yildan boshlab 2024-yil may oyigacha mazkur dastur uchun 2271 ta ariza qabul qilingan. Shulardan 121 a’zo davlat va 72 mamlakatda tahsil olayotgan 560 nafar talaba qiz saralab olingan.

Stipendiyaga da’vogar bo‘lish uchun talaba magistratura bosqichida yadro sohasida tahsil olayotgan bo‘lishi lozim. Ariza topshirish uchun motivatsion xat, tavsiyanomalar, ta’lim va yutuqlar haqidagi ma’lumotlardan iborat hujjatlar to‘plamini tayyorlash talab etiladi.

– Ariza topshirishda keraklisi – magistraturada o‘qish, anketa to‘ldirish, mavzungizni va maqsadlaringizni yozish, diplom, o‘rtacha ball (GPA) va tavsiya xatlarini taqdim etish, – deydi Dilfuza Tojibayeva.

Stipendiya ta’lim va yashash xarajatlarining katta qismini qoplaydi. Biroq eng asosiysi – u xalqaro akademik va kasbiy tarmoqlarga yo‘l ochadi. MAGATE ta’kidlashicha, dasturning maqsadi faqat alohida stipendiatlarni qo‘llab-quvvatlash emas, balki barqaror energetik kelajak uchun zarur inson kapitali salohiyatini rivojlantirishdir.

O‘zbekistonda AES qurilishi rejalashtirilayotgani mamlakatga yaqin yillarda yadro energetikasi, xavfsizlik va loyiha boshqaruvi sohalarida malakali mutaxassislar kerak bo‘lishini anglatadi. Shu nuqtai nazardan, MAGATE stipendiyasi – shaxsiy yutuqdan tashqari, mamlakat kelajagiga qo‘shilayotgan muhim hissa hamdir.

                                                                                                          Z.Tojiyeva