«Barselona» futbolkasida Afrika mamlakati nomi paydo bo‘lishi mumkin
Ispaniyaning «Barselona» klubi Kongo DR bilan yirik homiylik shartnomasi tuzishga yaqin turibdi. Unga ko‘ra, kataloniyaliklar to‘rt yil davomida 11 mln yevrodan (jami 44 mln yevro) oladi, deb yozdi Mundo Deportivo.
«Barselona» libosiga «Kongo DR — Afrika yuragi» degan logotip tushiriladi, maqsad — mamlakatning turizm salohiyatini targ‘ib qilish. Iyunda «Monako» (Fransiya) shunday shartnoma tuzgandi.
Ma’lumot uchun: Kongo Demokratik Respublikasi chindan ham Afrika qit’asining deyarli qoq markazi — yuragida joylashgan. Yirik mamlakat — Afrikada hududi kattaligi bo‘yicha ikkinchi, aholisi soniga ko‘ra uchinchi o‘rinda turadi. Mis, kobalt va uranga boy, ammo jahonning eng qashshoq besh mamlakatidan biri sanaladi. Mamlakat aholisining 65 foizi kuniga 2,15 dollardan kam sarflovchilar qatoriga kiradi. Jahon banki ta’kidlashicha, Kongo DR Afrikaning eng boy mamlakatlaridan biriga aylanish uchun yetarlicha resurs va salohiyatga ega.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter