Keyingi paytlarda Buxoro muhandislik-texnologiya institutidagi ichki tartib holatlari yuzasidan turli ijtimoiy tarmoqlarda tarqalayotgan xabarlar e’tiborni tortmay qo‘ymaydi. «Rektor o‘zini o‘zi yangi yil bilan tabrikladi» sarlavhasi ostidagi xabar muhokamalarga sabab bo‘lmoqda.

Institut rektori Sadoqat Siddiqova «Xabar.uz» muxbiri bilan suhbatda ko‘plab ijtimoiy tarmoqlarda bir tomonlama yolg‘on, bo‘htonga asoslangan xabarlar tarqalayotgani va bundan noroziligini bildirgan.

«Jurnalist, blogerlar tomonidan har safar ma’lumotlar so‘raladi. Biz to‘liq va batafsil javob beramiz. Lekin yondoshuv bir tomonlama bo‘ladi. Bir tomonlama yondoshuv bo‘ladigan bo‘lsa, bezovta qilishmasin. Xabaringiz bor, ko‘plab xabarlar tarqaladi. Bari tuhmat, nohaq. Bu haqda yuqori turuvchi idora, tashkilotlarga ma’lum qilganmiz. Jumladan, kiberxavfsizlik, ichki ishlar tomonidan ham xatlarimizga «bular O‘zbekiston hududida emas», degan javob keladi. Hozir ham men yuz foiz bilaman, o‘zimizni oqlolmasligimiz mumkin. Ammo, hozirda faqat bir nafar prorektor ish faoliyatida, bitta prorektorimiz xayfsan olgan, ikki prorektor o‘rni esa bo‘sh, endi tayinlanadi. Prorektor ham, men ham Yangi yilda rag‘batlantirish olmaganmiz»,-deydi Sadoqat Siddiqova.

Sadoqat Siddiqovaning so‘ziga ko‘ra, ayni paytda o‘zi davolanish ta’tilida bo‘lgani bois, prorektor Sobir Saidov vaqtincha rektor vazifasini bajaruvchi etib tayinlangan.

«2024 yil 26 dekabrdagi U-918-sonli «Moddiy rag‘batlantirish va yordam to‘g‘risida»gi tegishli buyruqqa asosan, rektor va prorektorlar rag‘batlantirilmagan. Institutda jami 1119 nafar xodim bo‘lib, ularning 1095 nafari rag‘batlantirilgan. 24 nafari esa mehnat qonunchiligiga asosan, intizomiy jazo chorasi qo‘llanilgani bois, rag‘batlantirilmagan»,-deydi institut matbuot xizmati rahbari Malika Shukrulloyeva.

Izoh o‘rnida: O‘zbekiston Respublikasi Mehnat kodeksining 18-moddasiga asosan (Ish beruvchining yakka tartibdagi huquqiy hujjatlari), ish beruvchilar qonunchilikda belgilangan tartibda o‘z vakolatlari doirasida muayyan xodimga (xodimlarga) yoki jamoaga yo‘naltirilgan va bir marta qo‘llanilish (ishga qabul qilish, mehnat sharoitlarini o‘zgartirish, boshqa ishga o‘tkazish, mehnat shartnomasini bekor qilish, xodimga mehnat ta’tili berish, xodimga nisbatan intizomiy jazo qo‘llash, xodimlarni rag‘batlantirish to‘g‘risidagi va boshqa buyruqlar) uchun mo‘ljallangan yakka tartibdagi huquqiy hujjatlar — buyruqlar, farmoyishlar, qarorlar (bundan buyon matnda buyruqlar deb yuritiladi) qabul qilishi mumkin.

«Xuddi shuningdek, Mehnat kodeksining Mehnat uchun rag‘batlantirishga asoslangan 299-moddasida ishdagi yutuqlar uchun xodimlarga nisbatan rag‘batlantirish choralari qo‘llanilishi mumkin. Xuddi shu moddaga yana e’tibor qaratadigan bo‘lsak, unga ko‘ra, intizomiy jazoning amal qilish muddati ichida intizomiy javobgarlikka tortilgan xodimlarga mehnatga haq to‘lash tizimida nazarda tutilgan mukofotlarni to‘lash to‘g‘risidagi masala mukofotlash haqidagi tegishli nizomlarda hal qilinadi. Ya’ni intizomiy jazoning amal qilish muddati ichida xodimga nisbatan rag‘batlantirish choralari, shu jumladan mehnatga haq to‘lash tizimiga kirmaydigan va mehnat natijalariga asoslanmagan mukofotlar ham (bayramlar, shu jumladan kasb bayramlari, yubileylar munosabati bilan va hokazolar) qo‘llanilmaydi. Shu qonun talablari asosida xayfsan olgan xodimlar rag‘batlantirilmaydi. Biz qonunni buzmaganmiz. Ijtimoiy tarmoqlarda tarqalgani singari men o‘z-o‘zimga rag‘batlantirish mukofoti yozmaganman va bunga haqim ham yo‘q»,-deydi vaqtincha rektor vazifasini bajaruvchi Sobir Saidov.

Ayni paytda davolanishda bo‘lgan rektor Sadoqat Siddiqova esa o‘zi va prorektorlar faqatgina Oliy ta’lim vazirligining tegishli buyrug‘i asosida rag‘batlantirilishi mumkinligini aytmoqda.

«Yuqori turuvchi tashkilot ruxsatisiz biz o‘z-o‘zimizga buyruq chiqarish orqali rag‘batlantirish olishga haqlimasmiz. Yana bir masala: 2024 yil 26 dekabrdagi U-918-sonli «Moddiy rag‘batlantirish va yordam to‘g‘risida»gi tegishli buyruqqa tizimda turibdi, uni yashirib bo‘lmaydi. Bunday buyruqlar doimiy nazoratda. Plastiklarga pul tushgan yoki tushmagan, naqd olingan yoki olinmaganini huquq-tartibot idoralari orqali aniqlash qiyin emas. Bilsangiz, men rektor bo‘lib kelgunimga qadar, barcha xodimlar bir yilda 2-3 marta rag‘batlantirish olishgan. Men esa bir yilda 10 ta bayram bo‘lsa, o‘ntasiga ham beryapman. Hammasiga. Birortasini xato qilmasdan. Faqat, «xayfsan»i borlarga bermadik. Bunga qonun yo‘l qo‘ymaydi»,-dedi Sadoqat Siddiqova.

Institutning Korrupsiyaga qarshi kurashish «Komplayens-nazorat» tizimini boshqarish bo‘limi boshlig‘i Keldiyor Abdullayev «xayfsan»i yo‘qligi, rahbariyat rag‘batlantirish pulini har bir xodimning mehnatiga qarab belgilashi, o‘zini ham boshqa bo‘lim boshliqlari singari ish beruvchiga bo‘ysunuvchi ekani, lekin qonunbuzilish holati yuzaga kelmagani haqida so‘zladi.