Prezident Shavkat Mirziyoyev Iqtisodiy hamkorlik tashkilotining 16-sammitidagi nutqida transport-kommunikatsiya masalalariga ham to‘xtalib o‘tdi.

O‘zaro transport-kommunikatsiya bog‘liqligini kuchaytirish haqida so‘z yuritar ekan, Shavkat Mirziyoyev a’zo davlatlarning aksariyati dengizga to‘g‘ridan-to‘g‘ri chiqish imkoniyatiga ega emasligini ta’kidladi.

Shu bilan birga, Osiyo-Tinch okeani, Janubiy Osiyo, Yaqin Sharq va Yevropa mintaqalarining yirik bozorlari bilan bog‘laydigan va bizning hududlarimiz orqali o‘tadigan transkontinental transport yo‘laklari salohiyatidan to‘liq foydalanish zarurligi aytildi.

«Kelgusida «Xitoy – Qirg‘iziston – O‘zbekiston» va Transafg‘on multimodal yo‘llarining ishga tushirilishi barcha a’zo davlatlar manfaatlariga mos keladi.

Toshkentda 2-noyabrda bo‘lib o‘tgan transport vazirlarining yig‘ilishida «O‘zbekiston – Turkmaniston – Eron – Turkiya» transport yo‘lagini rivojlantirish bo‘yicha qabul qilingan hujjatga boshqa a’zolarni ham qo‘shilishga, o‘zaro tarif va yig‘imlarni maqbullashtirishga chaqiraman», – dedi Shavkat Mirziyoyev.

Yuk tashish hujjatlarini raqamlashtirish kabi zamonaviy tizimlarni keng joriy qilish hamda samarali muvofiqlashtirish uchun Toshkent shahrida Tashkilotning Raqamli transport va bojxona ofisini tashkil etish tashabbusini bildirildi.