Yurtimizda xizmatlar sohasining iqtisodiyotdagi ulushini ko‘paytirish, joylarda mavjud imkoniyatlarni to‘liq ishga solish, turlarini kengaytirish va sifatini oshirish, eng muhimi, ushbu tizimni muxim drayverga aylantirish maqsadida qator qonun va qarorlar qabul qilinmoqda. Ushbu mavzu yuzasidan Iqtisodiy taraqqiyot va kambag‘allikni qisqartirish vazirligi va «O‘zbekiston Respublikasi Tashqi iqtisodiy faoliyat milliy banki» AJ rahbariyati hamda mutasaddilari ishtirokida matbuot anjumani bo‘lib o‘tdi.

Ta’kidlash kerakki, mamlakatimizda xizmatlar ko‘rsatish sohasining rivoji hamda iqtisodiy o‘sishdagi ulushini oshirish uchun keng ko‘lamli ishlar amalga oshirilmoqda. O‘zbekiston Respublikasi Prezidentining 2021 yil 11 maydagi «Xizmatlar sohasini jadal rivojlantirish chora-tadbirlari to‘g‘risida» gi qarori, mazkur soha rivoji uchun turtki bo‘ldi.

Mazkur Qarorda «O‘zbekiston Respublikasi Tashqi iqtisodiy faoliyat milliy banki» aksiyadorlik jamiyatiga ham qator vazifalar yuklatilgan bo‘lib, yil yakuniga ko‘ra erishilgan natijalar quyidagilarni tashkil etadi.

- O‘zbekiston Respublikasi Yalpi ichki mahsuloti III chorak yakuni bilan 520 trln.so‘mni tashkil etgan bo‘lsa, shundan xizmat ko‘rsatish xajmi 187 trln.so‘m (36%), 2021 yil 1 dekabr holatiga ko‘ra esa 257,3 trln.so‘mni tashkil etadi.
- Xizmatlar xajmi o‘tgan yilning shu davriga nisbatan 119,8 %ga o‘sib, aholi jon boshiga 7,4 mln.so‘mga yetgan.
- Ushbu sohada faoliyat yuritayotgan korxona va tashkilotlar ulushi 65,4%ni, kichik tadbirkorlik sub’yektlari ulushi esa 51,6%ni tashkil etadi.

Xizmatlar sohasini rivojlantirish bo‘yicha 2022 yilda xizmatlar sohasida qo‘yidagi ishlar 3 yo‘nalishda amalga oshirish belgilangan bo‘lib, unga ko‘ra;

- Birinchi yo‘nalishda 158 ta qishloq tumanlarining ixtisoslashuvidan kelib chiqib xizmat sohasini rivojlantirish (1 trln.so‘m va 300 ming ish o‘rni yaratish), 45 ta turistik ob’yektlari mavjud hamda 40 ta tog‘li va tog‘ oldi tumanda «tayyor loyiha» asosida turizmni rivojlantirish (infratuzilmani yaxshilashga 100 mln.doll), 115 ta qishloq xo‘jaligida daromad yuqori bo‘lgan tumanlarda zamonaviy agroxizmatlarni rivojlantirish, 27 ta sanoati rivojlangan tumanda savdo, umumiy ovqatlanish, logistika, mehmonxona, texnik xizmat ko‘rsatish va ko‘ngilochar maskanlar xizmatiga ustivorlik berish (xizmat ko‘rsatish loyihalariga 200 mlrd.so‘m), 100 ta xalqaro avtomagistral va temir yo‘llari o‘tgan hamda 25 ta chega oldida joylashgan tumanlarni savdo va logistika xizmatlari ko‘rsatishga ixtisoslashtirish (200 mlrd.so‘m va 50 ming ish o‘rni yaratish) kabi vazifalar ijrosi ilgari surilgan.
- Ikkinchi yo‘nalishda esa, 29 ta o‘rta va yirik shaharlar va 6 ta (aholisi 300 mingdan yuqori) tumanda zamonaviy bozor xizmatlarini rivojlantirish (200 mln.doll. va 200 ming ish o‘rni yaratish) ko‘zda tutilgan bo‘lib, bunda xizmatlar soxasini rivojlantirish uchun 10 ta tijorat banklari mas’ul etib biriktirilgan.
- Uchinchi yo‘nalish esa, Toshkent, Samarqand va Namangan shaharlarida yuqori daromadli xizmatlarni rivojlantirish (750 ming ish o‘rni yaratish), ta’lim va tibbiyot muassasalari joylashgan hududlarda boshqa xizmatlarni hamda yirik, zamonaviy savdo va ko‘ngilochar maskanlarni rivojlantirish, “TAX FREE” tizimini joriy etish, shahar ichida “DUTY FREE” do‘konlarini tashkil etish orqali savdo hajmini 2-3 barobarga oshirish, Namangan shahrida 3 ta, Samarqand shahrida 7 ta yirik ko‘ngilochar savdo markazlarini tashkil etish singari vazifalarni o‘z ichiga olgan.

Yuqoridagi 3 ta yo‘nalish bo‘yicha 2022 yilda savdo va xizmat ko‘rsatish sohasida jami 1,5 mln. ish o‘rni yaratish topshirig‘i berilgan.